鬧市中的一角淨土

好正的環境....

tclau，風雨中摇擺旣修竹真係好有畫意。竹有無3米高？

tclau  應該有六七米高，有两層楼左右。喺政府農場買番嚟嗰陣大約两三尺嘅苗，叫「金包玉」。幾好睇，竹身金黄色有两條翠綠色直線。

嘩咁高呀！係幅南瓜相度好似睇到「金包玉」旣金身綠線

秋日，洛神花開，花朶很短暫，但花萼則愈長愈大，而且很艷麗。



tomtomtom－－－好大粒好飽满
謝謝，影幾粒係比較大粒，可能係陽光較多。仲有好多陸續長大。

真系要卑个赞你！在花园中喝茶看风景，一乐也！

打完風，滿目瘡痍。執餐懞。


執好後整理一下自動洒水系統－－－
洒水時間掣無論平貴，用得幾年都會失效。有些是電子部份完全黑哂，有些是風琴膠膜穿裂，中國製造、法國製造、德國製造、無一倖免。有閒自已用洗衣機供水開關閥加時間掣DIY。

洒水時間掣，有好有壞，來自德法中港。


中國製



法國製，極少選擇，時間長短及相隔時段都沒有合用。



德國製嘉頓拿最好用，但約三年左右就失效，每個約售六佰元，有店鋪賣價高達一仟四佰元。


嘉頓拿除咗電子部份失效外，水控風琴膠都穿裂。


用洗衣機供水閥自製一個。


加埋電子時間掣就搞掂，好用過嘉頓拿

理想!

可惜我唔識點搞....但第二隻( 橙色果隻) 我用過, 但好快壞左啦....2個月都唔夠..

tclau 發表於 2013-9-25 20:37
打完風，滿目瘡痍。執餐懞。

tclau  你好勁,  不怕麻煩, 加埋放大鏡去維修兼DIY一個洒水器, 佩服佩服!

m36252 發表於 2013-9-25 22:34
可惜我唔識點搞....但第二隻( 橙色果隻) 我用過, 但好快壞左啦....2個月都唔夠..  ...

識都冇用，因為電子部份密封，完全拆唔到，運水部份多因膠膜老化破裂，冇零件更換，又唔識自製，唯有成個棄置。
如果你話法國嗰隻，即使唔壞都冇用，因為選擇少而且不知所謂：例如每星期澆水一次，每次120分鐘。我衹用過選擇「6」－－即每24小時澆水三分鐘。
如果你講緊德國嗰两隻「嘉頓拿」（都係橙色），我已經用壞咗四隻，平均壽命三年左右。

cylau0910 發表於 2013-9-25 23:29
tclau  你好勁,  不怕麻煩, 加埋放大鏡去維修兼DIY一個洒水器, 佩服佩服!

冇辩法，年紀大，冇放大鏡睇唔到細微嘢。
以為將所有壞咗嘅時控洒水器拆件，將好嘅零件合成一個用，慳番啲。點知運水部份啲膠全部都喺裂嘅，可能係time expired。於是决定自製一個，希望耐用啲。

tclau 發表於 2013-9-25 20:37
打完風，滿目瘡痍。執餐懞。

lauchokiu  ---師兄，你d設備好齊全呀！
我要同時用三個時控洒水器，两個用喺天台，一個用喺露台。誰知佢地差唔多一齊壽終正寢，以為拆埋嵌成一個用，但係徒勞無功。
睇嚟市面賣嘅產品運水部份經不起時間考驗，為求一勞永逸，衹有自已整番個嚟用。

劉兄, 同意你說的"洒水時間掣無論平貴，用得幾年都會失效。"
以前我亦有這問題, 後來, 改用村屋舊水箱, 收集雨水+液肥, 然後加有時間掣的抽水泵, 便耐用許多! 你試試!

malike 發表於 2013-9-26 12:33
劉兄, 同意你說的"洒水時間掣無論平貴，用得幾年都會失效。"
以前我亦有這問題, 後來, 改用村屋舊水箱, 收 ...

你好環保！用泵洒水，個泵要好大馬力先得噃。

tclau 發表於 2013-9-25 20:37
打完風，滿目瘡痍。執餐懞。

tt28----你好,我都想整自動灑水,請問可以教下我嗎?

自動洒水主要係靠一個時間開關掣同灑水分佈系統。
時間開關---用市面賣嗰啲簡單但易壞（壽命約三幾年）。用電水閥加時間掣可靠耐用，但要用市電，如在室外，注意配件防水以防漏電。
灑水系統---室內可用滴水，天台露台可用噴霧花洒，農田可用摇擺噴水。前两者由於個人需求多少和分佈不同而異，繽繽樓上有售，個別水滴、噴嘴、插口、膠喉幾蚊至十零蚊一件（千花百門，可以去睇睇有乜東東啱使），加埋加埋買得多都覺得幾貴。後者係鴨寮街啲鋪頭有售，十零至二十零蚊一個，喉管、分义接駁、膠喉等亦可在鴨寮街揾到。至於接駁就因各人唔同要求而須要特別設計，例如有啲植物需要多水，有啲需要乾啲。建議系統設計祇作附助作用，如出外旅行等，人工針對性澆水還是必要。

唔知乜野原因，棵羅漢松枯咗。不過萬事萬物，有始必有终，可以留番個龍缸種無花果。



花友提倡有機肥，整魚肥唔難，最難係收隻魚雜，平日甚少買魚，魚檔唔會擺低生意招呼我。開頭一個星期即使擰緊罇蓋再加膠袋扎實都會滲出惡臭，好彩天台空曠，免強可以接受。賣相就幾兇惡心。



個幾星期後，賣相依然核突，但係己經冇咗惡臭。



個幾月後，樣子好啲。唔臭，有酒味。



又整咗罇滅蟻水，係用硼酸粉加糖開水，昨日用咗啲，覺得效果幾好，令早唔係好見啲蟻。

劉兄, 想請教滅蟻水點用法.
因為用開既一般都係固體既現成蟻藥, 既怕影響家中小動物,  又唔敢太接近盆土, 滅蟻水會比較安全嗎 ?
謝謝.

好靚呀…羡慕ing

xx_Luca 發表於 2013-11-25 13:49
劉兄, 想請教滅蟻水點用法.
因為用開既一般都係固體既現成蟻藥, 既怕影響家中小動物,  又唔敢太接近盆土,  ...

我衹係到藥房買一包硼酸粉（＄２）加一塊片糖再加水至溶哂，用飲管滴喺蟻出沒處，啲蟻慢慢地聚埋僂啲糖水，後來就唔見哂。唔知有幾大功効。聞說有人用硼砂製食物，相信對人同動物嘅健康影响唔大。

tclau 發表於 2013-11-25 19:37
我衹係到藥房買一包硼酸粉（＄２）加一塊片糖再加水至溶哂，用飲管滴喺蟻出沒處，啲蟻慢慢地聚埋僂啲糖水 ...

ahfour99---據聞要食一噸左右就會有問題(中毒)  發表於 20 分鐘前
ahfour99---據聞硼酸係用作防腐

四哥講得啱，硼酸係低毒牲消毒防腐劑。一般可以用嚟對傷口消毒。有餐館用來做牛肉鬆化劑，我曾經有一次食過一碟牛肉飯，可能落咗過量硼砂，根本難以入口，所以想用硼砂服毒都好難。所以用來滅蟻滅蟑螂都係比較安全同有效。

yukyo---試過用硼砂殺蟑螂，一年屋企無晒小強。用過黎殺蟻，蟻唔食，會再試吓你個方法。

可能啲蟻唔食硼砂，但喜歡食糖。呢樣野仲係試試吓。

tclau 發表於 2013-11-25 19:37
我衹係到藥房買一包硼酸粉（＄２）加一塊片糖再加水至溶哂，用飲管滴喺蟻出沒處，啲蟻慢慢地聚埋僂啲糖水 ...

謝劉兄~ 又簡單又安全, 我都學你整返樽先

魚腸我都有用過呀, 話好好架, 不過只係晌翻盆時放泥裡面.
如果好似你咁整, 一定俾家人炸c ....