非洲紫羅蘭講座後之分享

星期六去左非洲紫羅蘭講座，發現完來自己知既野太少、錯既太多，從網上面搵到既資料亦不足及有限，所以覺得三十蚊係抵到爛！推薦新手去聽，必定獲益良多，有興趣花友可去 LCSD 網頁睇下幾時再開班 (四月無)

應花友要求，抄左notes 與大家分享（仲勤力過當年返學），當中只是從講座中既得著，未必岩哂所有花友用，都係果句喇，先了解自己既種植環境再決定係邊種方法岩自己。另外資料係導師 Ms. Ng 於講座以powerpoint 播放，非本人意見，當中亦有加多減少純粹分享，不喜切插。

非洲紫羅蘭 (African Violet) / 非洲堇 / 聖保羅花Saintpaulia，屬於苦苣苔科，最早期為五瓣，貌似星形花，花觀五裂而出現五瓣
(紫羅蘭為另一種花，所以唔好少左兩隻字，全名應該非洲紫羅蘭)

以下資料如有錯漏，請通知更改～謝謝！

分類及生態特點

生長條件


常見病

澆水　

矯形　

繁殖

換泥

老了的非洲紫羅蘭




** 大部份資料來源: LCSD 舉辦的非洲紫羅蘭護理 - 導師: Ms. S.Y. NG

分類以成株直徑量度 (無數字果d因為唔記得左/亂左,如果花友知或記得,請提供~謝謝)
超迷你形：6cm以下 (2吋以下)
迷你形：　6-15cm   (2吋-6吋)
半迷你形：15cm-20cm (6吋-8吋)
標準形：  20cm以上 (8吋以上)
蔓生形：

(thx Lok 糾正)

量度如下：



花瓣：
單瓣

半重瓣

重瓣
可以睇下sunsunsun既靚花

花色：
單色
雙色
多色 (兩隻色以上)

葉類：
單葉 (一柄一葉)
複葉 (一柄多葉)
*呢盆就一柄兩葉




葉色：
- 綠葉
- 斑葉 (兩色或多色)
  * 杜美萊斑葉：斑紋由葉邊向內形成 (可參考植物圖監帖 - skbugs、Dora )
* 馬賽克斑葉：斑紋由葉內向外形成 (未搵到有關圖片，歡迎大家提供)
* 皇冠型斑葉：斑色由中向外擴散
可參考 George既 各種斑葉

葉型:

有波浪型、凹凸型、心型、少女葉等等...

非洲紫羅蘭生態特點：
- 根系幼細，分佈淺
- 株型矮小，佔地少
- 莖、葉、花肉質肥厚，含水量多
- 葉片及全株有毛毛
- 莖短，葉片平鋪重疊，密度高，以”品”字型三塊葉一齊生長
- 開花期長，可終年不斷開花，天氣涼更易開花
- 由於遺傳基因不穩定，易產生變易，現今大約有二萬幾種非洲紫羅蘭

十分十分十分感激樓主~  

真係想比分~ 可惜我冇甘嫁能力

我都想下次参加...你覺得適合我地呢d新手聽嗎??

生長條件：

喜暖畏寒、好濕忌澇、明亮、空氣濕度高但又要通風既環境最好，而七至八月就最難捱，一過中秋就無問題！

- 氣溫：生長溫度 18-25 度係最好；30度以上生長就會放慢，亦會因此進入休眠期甚至死亡，即使開到花都唔會大朵；10度以下亦會放慢生長，葉片有可能下垂、反捲或死亡

- 光照：對光敏感，以自然光最好或明亮既散射光，唔可以直接日曬，而最岩既光線以唔使開燈睇書既光度為最好，可以一、兩星期拎去一ｄ光源較高既位置刺激花芽生長

- 濕度：高濕氣環境，50-70度濕度既生長環境係最好既，而迷你、蔓生就60-80度之間

- 植料：選擇一ｄ養份豐富、輕、疏鬆、排水透氣（即係可以容易流出水）、吸水保肥、清潔無菌、性質穩定；唔好用一ｄ植料會發脤既，容易迫死ｄ根呀！
  * 珍珠岩（日本珠石） – 中性、清潔無菌、不含養份、貯水力高，但保肥力低
  * 泥炭土 – 酸性重、含少量養份、吸水力強、保肥力高
  * 蛭石(即金泥) – 酸性重、清潔無菌、有韌力，保水保肥

除以上基本植料，亦因應自己需要附加：
  *硅酸鹽白土Silicon  (即美能安A)：內有鎂、鐵助改良土壤，中和植料酸性，又可淨化植料，防止細菌繁殖及根腐爛
  * 炭：可幫助過濾雜質、除臭，可以將少量炭放盆底以助分解有機物質，吸收殘留化合物

- 肥料：非洲紫羅蘭雖喜肥，但以淺肥、薄肥為佳，屋企種植用化學肥較好，而有機肥較易傷根；另以氮 (N)、磷(P)、鉀(K)為主
  * 氮 (N) – 促進莖、葉及新芽、小苗生長，常稱為 “葉肥”
  * 磷(P) – 用以影響植株發展、促花芽分化，提高花朵質量，常稱為 “花肥”
  * 鉀(K) – 令新陳代謝正常，有助植株抗病防寒，但唔適合係開花時用)，常稱為 “根肥”

e.g. (咁岩有盒肥係度)
N-P-K 數值不同就用係不同時期



另外常用魔肥對開花有利，可幾個月落一次，每次數粒為佳

- 施肥：18-20度多用氮肥；花期用磷肥；斑葉少施氮，因會令斑紋減少或走色
  *粒狀肥料：施肥最好三個月至半年落一次
  *液肥：植料淋濕透後圍泥邊加，唔好直接淋到根部
  ** 必記唔可以係缺水情況下施肥

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
用既植料比例無話一定，要按照AV生長的環境，如太濕可減少保水力高既植料；如太乾燥則加多一點

常見非洲紫羅蘭病：

-　軟腐病：淋水太多導致葉逐塊逐塊咁爛上去
-　灰霉病：留意葉面一撻白或灰
-　薊馬：會咬穿花粉襄，薊馬好細粒又會跳，主要埋係花芯內
-　白粉病

導師建議約7cm距離擺放較佳，唔好葉疊葉，一棵有事就好易傳染開去

另外新帶返去既非洲紫羅蘭，最好先隔離以確定無病先好將佢加入你既大家庭！

澆水

另外有講及淋水方法，導師建議用長尖咀壺去淋泥面，避免淋到葉面；

又可以用棉芯吸水方法，但要用一ｄ唔會易霉易爛既棉繩，以一個 U 型穿過盆底去吸水；

係咁易手繪左張．．．



盆底吸水，原來我一直都係錯，因為我係加水係盆底比佢吸上去，有時都會係泥面淋到濕透流出水再繼續吸水半粒鐘，但導師話咁係唔好，應該用魚缸用既濾水棉放係低加水再放盆花上去，但我唔明咁樣做同唔用濾水棉既分別，係咪因為就咁用水會令盆低泥被水沖走？唔記得問添～

矯形

另外葉係三塊三塊咁出，所以修葉都應該要三塊三塊咁剪，但因修葉後會出現窿窿位，想矯正葉型，要係未淋水前ｄ葉少少軟時可用牙籤去固定葉型，每次可慢慢將牙籤移位，大約定佢一個月度個形就會企穩

繁殖

葉片繁殖
建議由底層數上第三層剪葉作繁殖之用，因最底部既修葉較老，但唔等於唔可以用黎繁殖！

另外原來要一盆靚靚av出現，就要 “捨得”！

因為一塊葉會出好多芽，當入泥後不段生長，就要開始同佢分芽，導師即場示範分芽，只留一棵健健康康又大又靚既芽就算，其他芽就唔要架喇！而其他花友，當然唔放過ｄ捨棄既芽帶埋返歸！
而分株建議有一個完整既植株+根就very good!
開花期想分株，於分株後就要摘左花柱

換泥

原來要每半年換一次架！

開花期就咪攪佢喇！！開完先換都未遲～

老av

如果出現長頸鹿咁，就可以切左根位及修走一ｄ老葉重新入泥

你好有心機啊!! take 咗咁多notes...對我地呢d新手嚟講--睇住先都會得益唔少

分享一下導師 Ms. Ng 帶來的作品

呢盆好靚，忍唔住要影低佢呀！


呢個好特別！

最後，導師每人送左一盆非洲紫羅蘭比出席者



上面咁多盆，帶左呢拎返屋企！

多謝無私分享，努力學習中。

Breeze 發表於 2012-3-12 13:31
十分十分十分感激樓主~  

真係想比分~ 可惜我冇甘嫁能力

好差住你先, 將來有機會一定還返比你~

cherry 真偉大！

lok_1980  $30仲有花拎走添..........  發表於 17 分鐘前

所以係咪抵到爛丫,有得學野仲有花送!!

在此特別感謝 Lok_1980 幫我做緊校對　

多謝cherry的愛心分享,萬歲!