士多啤梨~~help~~ >__<"

Help~~

我係新手, 年三十晚個日買左盆士多啤利盆栽, 個時成盆野都好健康, 仲有果實.  (如下圖)





但唔知點解個幾星期後盆士多啤梨就開始死下死下咁, d莖又彎曬腰咁, 有d葉又開始變黃, d熟既果實我已經剪左落尼, 但細個d果實好似好乾水同埋唔識再大咁, 有d仲謝謝地. (如下圖)



唔知有無種開士多啤梨既朋友可以解答下小妹既疑問呢..

1. 聽講士多啤梨唔可以淋太多水, 所以我都唔敢淋咁多, 平均兩日淋一次水, 會唔會太少??

2. 早兩日我見好太陽, 所以放盆野出窗邊曬下太陽, 點知兩三個鐘後好似反而謝左咁. 士多啤梨係咪唔可以比太陽直接照射加??

3. 我盆野係咪唔夠肥料呀?? 有咩有機肥又易買又唔臭既?? 聽講雞蛋殼碎 & 茶葉渣都係有機肥, 放響泥面就ok, 雞蛋殼 & 茶葉渣岩唔岩士多啤梨用??

希望有高人可以指點迷津啦...Thanks...

[ 本帖最後由 kl_carrie 於 2008-2-19 13:12 編輯 ]

我果D 近排有太陽就日日淋水, 2 日無淋水先灣晒架播~
我放室外, 士多啤梨鍾意晒太陽架~
經驗之談, 希望幫到你喇~

Thanks for your reply..
咁我諗我可能真係淋得小水得滯, 因為成日都覺得d泥好似好乾咁,
我諗要淋多d水同多d比佢曬下太陽先得啦...

我覺得....個盆太細喇~ 逼到佢吸唔到養份&水.
試下同佢分盆丫~ 或者俾個D大既盆佢喇~

[ 本帖最後由 everydayfan 於 2008-2-21 15:06 編輯 ]

應該係唔夠水，我之前有一日冇淋水，第二日就會咁

水是撐起植物其中一個重要的元素之一
如果係水..好快會變番好
如果唔係..睇佢個狀況
你加完水..都唔得的話.有機會同佢講byebye

我都買左一盆士多啤梨，但D士多啤梨好細粒就轉紅，係乜o野原因呢？

前幾日阿媽話我知盆士多啤梨既泥係唐泥(其實我唔知咩係唐泥),我見d泥成日都好似好乾咁, 上網又見人地種士多啤梨好多都用科學泥, 今日出左花壚買左d科學泥, 仲買多左個盆諗住換泥同埋分盆, 但原來成棵士多啤係"痴"住既, 分唔到盆, 但我就已經換過曬d泥, 淋左水, 落埋有機磷肥, 希望佢生生性性, 快高長大啦...

Thanks 阿行...
我已經九杪九將盆士多啤梨放返出露台啦...

我o個盆係放o係花園種，但唔知o係咪新年時太凍呢？我o個盆都係唐泥，其實應該用邊種泥最適合呀

我覺得唐泥會大得快D, 但感覺科學泥比較企理同乾淨同疏水.
所以我依家係2溝...

原帖由 Sophia 於 2008-2-22 20:13 發表
我都買左一盆士多啤梨，但D士多啤梨好細粒就轉紅，係乜o野原因呢？

我果盆都有咁既情況，而且唔開花了，好似停止生長，我諗可能要換泥

原帖由 everydayfan 於 2008-2-27 14:32 發表
我覺得唐泥會大得快D, 但感覺科學泥比較企理同乾淨同疏水.
所以我依家係2溝...

咁想問o下唐泥o係邊度買呀？

原帖由 Sophia 於 2008-2-27 23:04 發表


咁想問o下唐泥o係邊度買呀？

我在"W"字頭超市買到...5蚊包

原帖由 lammadick 於 2008-2-28 09:19 發表

我在"W"字頭超市買到...5蚊包

Thanks!!

垂死既士多啤梨經過我換泥,施肥,剪曬d枯左既葉同埋花, 再將佢放左響全屋最多陽光既地方之後,
而加總算係健健康康, d葉變返翠綠色.  仲有d葉BB"標"緊出尼添..  
(但係D枯葉比我剪曬之後, 盆野就變得好細盆囉.. )


前兩日仲比我響其中一塊葉底下發現到兩棵小苗, 唔知係唔係之前既士多啤梨跌左D核落泥度,
而加出苗仔呢..



其實如果種士多啤梨的話, 我覺得科學泥好似好過唐泥.  因為之前用唐泥果時, D泥成日都
好似好乾咁,朝早淋完水, 收工返到屋企佢又變得好乾好乾, 好似一D水都無咁, 換左泥之後
好似無左好乾LE個問題 (唔知係咪心理作用呢..嘻). 而加見佢由之前既謝樣變成而加健健康康咁,
真係好鬼開心...嘻...希望佢快D再生士多啤梨啦...

會唔會係唐泥容易變實dap dap, 當你淋水時佢泥吸唔到水, 情況就好似用水淋落舊石度,
我之前買過一棵胡椒木就係咁, 個個都以為我唔淋水, 但屋企附近高人教我用枝魚旦trim吉下佢, 等D泥疏返D.
之後棵野又生得好靚播~
恭喜你棵士多啤梨救得返呀!

原帖由 everydayfan 於 2008-3-13 17:56 發表
會唔會係唐泥容易變實dap dap, 當你淋水時佢泥吸唔到水, 情況就好似用水淋落舊石度,
我之前買過一棵胡椒木就係咁, 個個都以為我唔淋水, 但屋企附近高人教我用枝魚旦trim吉下佢, 等D泥疏返D.
之後棵野又生得好靚播~
...

係呀~~d唐泥好實dap dap, 成日都好似好乾咁, 盆士多啤梨又死死下...
所以把心一橫就直情換左d泥佢囉...

多謝曬你既恭喜...

我之前都係花墟買左兩盆士多啤梨, 發現d唐泥入面好多虫, 有d白色, 有d橙色, 有d灰色, 仲有丘引 ..........嚇死我  科學泥乾淨好多

原帖由 bbcat 於 2008-3-14 15:48 發表
我之前都係花墟買左兩盆士多啤梨, 發現d唐泥入面好多虫, 有d白色, 有d橙色, 有d灰色, 仲有丘引 ..........嚇死我  科學泥乾淨好多

唔係呱咁色彩繽紛