聽落有段古喎
我想聽故仔呀
oneonewe 發表於 2010-3-18 12:13
11師姐吩咐到, 做師弟嘅豈敢怠慢吖, 只不過呢幾日多嘢攪冇上嚟.
好, 就借天哥少少位講多幾句.
故事發生喺6年前嘅一個晚上, 當我放工返到屋企樓下, 正當步入大堂之際,
迎面有位阿叔他他條咁行出嚟, 只見佢手揸半邊蘋果, 膊頭就有隻綠色嘅雀踎咗喺度,
阿叔應該係同樓住客, 我見大家都係養雀之人, 好自然會望一望隻雀, 然後就開始對起話嚟嘞.
「咦, 鸚鵡喎, 咁夜帶出街?」
「係呀, 同佢去公園」
「家吓天都黑晒, 做乜唔日頭帶佢去玩?」
「帶佢去放生囉」
「吓! 放生鸚鵡? 你講笑咋下話?」
「係真」
「佢咁得意, 做乜唔養呀, 隻鸚鵡唔平喎?」
「朋友送嘅唔使錢, 養咗十幾日, 屋企個個都唔鍾意, 咪放咗佢囉」
「佢仲好細吓喎」
「係, 佢食蘋好叻」
「你淨係餵佢食蘋果?」
「你鍾意不如送咗俾你吖」
我再望真吓, 隻鸚鵡連仔毛都未退, 頂多6-7個月大,
估唔到年紀細細就遭人拋棄, 雖然俾阿叔收留, 以為搵到戶好人家啦,
唉! 完全冇得選擇, 點知到頭來都係要傷痛多一次.
陰公, 攞去公園放低唔理, 咁攪法分分鐘做咗野貓嘅晚餐唔定, 又或者飛咗出馬路俾車轆扁都唔定,
再唔係俾個唔識養鸚鵡嘅人執咗又點, 實聽養呱都得嘞.
唉! 咁嘅所為同拖個含住奶咀嘅細蚊仔去公園揼低佢不顧而去, 有乜分別喎?
佢既然問我要唔要, 咁仲使考慮咩, 拿拿臨帶隻鸚鵡返屋企啦~ |