本帖最後由 花園仔 於 2009-9-2 12:25 編輯
8875# mamafan
老師好, 大家好!!!!!
我8月中開始種翠肉瓜(上網見好似種木瓜咁, 不過矮矮的), 種子發芽好快, 無耐換了大盆, 一週前仍進展良好, 有5-6塊葉,
近日不知怎的, 最底的兩塊葉開始發黃, 同埋枝梗近泥一段破開了(枝梗好似飲管形), 請指教.
另想問, "薄肥多施" --> 每7-10天施花生麩水(1:15->1:7)??? 咁夠薄未呢? 定要再薄d?
老師講過基肥宜薄不宜過多, 因可及後薄肥多施補充, 對新芽新苗可怎樣施肥呢?
由定植起每7-10天施花生麩水(1:15->1:7)? 施肥要於有太陽時做, 苗苗又要半陰晒, 半陰晒施肥會唔會yip死佢?
我的瓜瓜葉黃了關唔關事呢(yip死)?
多 謝 分 享 !!!!!!!!!!!!
=======================================
mamafan及大家好!
講起翠肉瓜我都想種架, 先棑到衫兄諗住買D種籽, 老細話D農友都未開始種啵,
所以佢嗰罐種籽仲未開封呢, 我諗吓等有農友買黎種我先郁手喇!
我係咁樣對付苗苗嘅:
盤仔育苗, 落咗種籽等佢出芽就可以放體陽光下嘞, 當然泥土梗係要保持濕潤啦.
濕潤嘅意思係D泥濕度剛剛好啦, 因為太乾苗苗會渴死,
太濕又會令苗苗嘅根固步自封因為唔使延伸就可以得到超量嘅水份洛, 甚至浸爛吽死D根添.
等到苗苗健健康康長出幾對真葉咪移種落大盤或地上囉!
移種時睇吓有冇傷到苗苗嘅根, 如果冇傷過苗苗嘅根咁就可以繼續正常俾佢各種養料(水份肥料)及陽光,
呢D就係我點解會採用軟膠盤仔育苗嘅原因嘞 -- 佢唔傷根吖馬!
如果移種時有傷到苗苗嘅根,(極多數都會)咁就要選擇適合嘅時間黎進行移種洛,
例如陰天, 傍晚, 目的係避免高溫或强光影响, 因為郁過傷過根嘅苗苗冇咁快恢復正常吸水動作架,
所以移種咗頭嗰幾日體棵苗苗仲未適應生穩嘅情況下要對苗苗小心呵護架,
例如要避免陽光直射(搬到半陰曬地方或加蓋遮光網), 水份控制更加要小心,
千祈唔好落肥料住呀, 尤其係D發酵未完全嘅肥料隨時將苗苗醃死架!
等到苗苗適應咗新環境後精神爽利時咪可以狂曬囉, 施吓薄肥棵嘢就爸爸聲大啦!
至於你問嘅肥料問題, 花生麩浸水我係咁處理嘅:
揾個可密封嘅桶, 放入花生麩(麩與水嘅比例約為 1:15) , 放滿80%水, 搞勻佢後冚盖密封, 桶上寫上日期.
大約隔两星期打開桶盖搞勻吓佢後冚盖密封翻. -- (重複又重複)
三個月後預算發酵完成, 随時用得....(發酵越耐功效越高氣味越少)
使用: 打開桶盖搞勻麩肥, 將需用份量嘅麩肥加水冲淡(麩肥與水嘅比例約為 1:7)
施肥後即淋翻D水以免有時手重淋多咗燒傷植物.
嗱, 花生麩粉1:15 水浸咗二三個月後再以花生麩水肥1:7水稀釋為<正常肥>
<薄肥>即係以花生麩水肥1:10(或14)水稀釋先至稱得上<薄>架馬!
剛剛又浸咗桶<花生麩水肥> |
顯身卡
