農田種植 の 小女王家族 ( 最新update 14/5 & 21/5 )

6/4正式收田終於可以將我d仔仔女女放晒落田喇！
不過由於子女眾多，落田之前當然要有完善既床位分配啦！
首先介紹下我既家族成員先：
包括有生菜、苦瓜、節瓜、櫻桃蘿白、迷你蘿白、4吋紅蘿白、通菜、蕃薯、莧菜、芫茜同菜心！
之後仲會增加南瓜、毛豆、同埋一d香草類！除左我地一家人，我地仲有養寵物添架！大家睇落去就知架喇！
間唔時我仲會介紹下我d隔離鄰舍同埋趣事比大家知！

呢個就係我地既床位分配圖喇！
由於技術上既緣故，所以大家需要打側個頭睇先可以同d相做返對比架！
請多多包涵！


6/4 落田喇！影返張全家福先，不過好多仲未生到出黎。


15/4 大家都開始走出黎霸頭位喇！


21/4 打完個風，好彩一家人仲齊齊整整。
跟手仲落左d花生麩水同海藻水儲肥佢地添呀！希望佢地都快高長大啦！


27/4 今日一去到田已經係咁比其他園友圍住塊田喇！完來佢地對我d生菜都好有興趣！哈哈！
今日主要去收割左部份生菜、移返正d苦瓜苗、清理左d被蟲食晒既櫻桃蘿白葉、順便再接再厲咁落返d櫻桃蘿白種子、
另外收割左第一輪既通菜等佢地再生返密d、移植左2棵迷迭香、同埋落左d辣椒種子同西瓜種子落苗盤培苗！
當然最後梗係有施下肥啦！咁樣下個禮拜就可以收割晒所有生菜黎食喇！
   

1/5 今日終於買到竹去搭棚喇！由於係第一次搭，所以論論盡盡咁！希望個棚日後穩穩陣陣啦！
另外今日去到見到塊地真係無晒蟲喇 ，相信應該係D迷迭香發揮功效，同埋見到有D櫻桃蘿白大個左好多呀！
  

14/5 今日終於的起心肝「種族大清洗」 喇！
因為開始發現塊地唔夠肥，可能因為自己太貪心種左太多野搶肥，
再加上附近o個棵榕樹不停生d根過黎搶埋一份 ，所以今日決心將收得既就收，無希望既就剷除，
等塊田抖下順便留返多d空間下個星期落返d新苗先！
   
呢幾日去到田都無咩心機，因為見到人地d瓜苗生長得勁茂盛又深綠，
而自己o個幾棵苦瓜同節瓜就青BB咁， 唉！
真係睇見到心酸！唯有今日再努力d追多次勁肥，睇下催唔催谷得返啦！

21/5 終於鬆一口氣喇！今日去到見到d節瓜同苦瓜都變返深色d喇！相信應該係上次追肥既成果 ！
由於上次已經收晒d菜，塊地變得好人丁單簿咁！所以今日再落返d莧菜種子，同埋移埋d西瓜苗同辣椒苗落去。
   

[ 本帖最後由 小女王 於 2008-5-23 07:12 編輯 ]

因為屋企人對於呢塊田既期望實在好大..哈哈！
為免佢地失望，所以3月尾已經培定d生菜苗，6/4收田後就即刻可以移苗喇！
生菜又易種、又無蟲！包有得食！
不過由於已經開始轉季，所以只可以種埋水尾呢一輪就壽終正寢喇！

4月6日移左苗唔記得幫佢地影單人照，呢幅已經係4月14日既相！
仲係細細棵既生菜BB仔，不過已經好嫩綠下喇！

4月14日仍然細細棵的生菜

4月21日黑雨過後，竟然一棵都無死到呀！
只係一個禮拜咋已經大棵左好多，仲鬼死咁翠綠添呀！

4月21日翠綠的生菜

4月24日好心急、好心急...好似無乜大到...
梗係啦！對上o個次記錄只係3日前！哈哈！
其實一黎心急想快d有得食，二黎好想可以騰返d空位出黎比2棵苦瓜呀！

4月24日等待收成的生菜

4月27日因為d生菜都生長得好健康、大得好快，所以今日決定收咁d黎食，
等佢地可以唔使咁迫，等餘下落黎既可以再生大棵d，咁樣下個禮拜就可以一次過收晒黎打邊爐喇！
  

  

               

5月3日 今日去開塊田度順便收晒d生菜lu，嘻嘻！最終佢地既命運都係比我用左黎打邊爐！
烚下烚下...烚下烚下......


[ 本帖最後由 小女王 於 2008-5-23 07:33 編輯 ]

雖然20/3已經開始浸定d種子，仲足足浸左一日一夜先落苗盤。
但係結果都要等到4月頭先開始有2棵發到芽！不過好彩發左芽之後都大得好快！
由於塊地未有空位，而且之前又打風黎，所以等下等...等到21/4先正式拎棵苦瓜去落地。
你咪以為已經種左落去，其實我係連埋苗盤成盤野放左落泥裡面，方便遲d移苗ma，哈哈！

呢棵係其中一棵苦瓜苗BB

4月21日新加入的苦瓜苗

24/4再去睇既時候，唔知係咪我眼花呢？感覺上好似大棵左好多咁！
同埋個頭開始出一絲絲咁喇！可能開始大個仔會生頭髮！
不過呢張影唔到佢D頭髮，但係呢張個feel實在太正喇！所以一定要post出黎！
我老公話如果可以加多幾滴水珠既話就更加正喇！

4月24日長大中的苦瓜苗

1/5 今日搭完棚之後，3棵苦瓜終於可以有屋住喇！
以下係苦瓜1號、2號&3號。(抱歉由於仲未收D生菜，所以要比多少少眼力
       

14/5 唉...唔知點解，d苦瓜苗呢幾日變得青BB咁呀！
最初移苗o個2棵仲好似無大個咁，搭左棚咁耐都「冷」唔到上去，實在令人好擔心！
反而遲d移苗o個棵苦瓜3號從後趕上，雖然都有d青BB，但係至少佢已經「冷」左上棚喇！
   

21/5 今日去到終於鬆一口氣喇！d苦瓜苗終於深色返d喇！仲明顯大左好多同埋出左好多花lum仔添呀！
     

[ 本帖最後由 小女王 於 2008-5-23 07:27 編輯 ]

呢棵節瓜苗...實在要讚一讚北區公園！因為係佢地預早培定苗送比每一位園友架！
除左節瓜苗之外仲有矮瓜同南瓜添呀！不過就無得揀，係o係抽田o個陣抽埋既！
佢地都有講過其他區係無架！不過佢地想每一位園友都可以有收成，所以就咁做喇！抵讚！
我見有d矮瓜苗落左地2個禮拜左右已經有瓜可以收成喇！
不過可以抽到節瓜苗我都好開心，因為我唔鐘意食矮瓜同南瓜架！哈哈哈哈哈！

6/4抽田o個日收到既禮物！唔好咁張揚呀！

4月14日禮物節瓜苗

打風o個日最擔心既除左d生菜之外...就係呢棵節瓜苗喇！
無法啦！話晒都唔係自己親生仔ma！種死左就唔好啦！
好彩...21/4去度見到佢仲亭亭玉立，仲大個左好多添呀！

4月21日風雨後的節瓜苗

24/4發現佢除左大個左之外，仲開始無腰骨喇！
我諗我要開始準備搭棚喇！

4月24日長大中的節瓜苗

27/4 繼續努力成長中既節瓜苗，預計聽日應該會幫佢搭棚喇！


3/5 早2日搭完個棚之後，今日再去睇既時候，棵節瓜已經急不及待咁爬左上去喇！
14/5 雖然d葉好似有d青BB，但係仍然生長得好快！
  

21/5 今日去到見到棵節瓜已經出左好多朵花喇！但係見有D花已經謝左都唔見有瓜BB既踪影！
睇極D花都唔似係花女.....見到人地已經開始有收成喇！唔知我幾時先有瓜BB出世呢？
     

[ 本帖最後由 小女王 於 2008-5-23 07:40 編輯 ]

6/4收地時播左種
話咁快14/4已經發左芽，變晒苗BB喇！

4月14日櫻桃蘿白發芽了

又話咁快咁....o係21/4變左「寵物1號」阿虱仔既飼料喇！

4月21日成為了飼料的蘿白葉

寵物1號..狗虱仔

時光飛逝...到左24/4，又成為左「寵物2號」肥蟲既早餐！  
仲食鬼晒添！激死！

4月24日餵飼寵物蟲

4月24日食得一乾二淨的蘿白葉

27/4 今日去到仍然見到3條蟲，相信應該都仲係肥蟲同孖蟲TWINS，
終於都忍心咁將D葉梗同蟲蟲除去，好彩都仲有幾棵好似有蘿白生出黎！
不過我仍然再一次落左種子，仲移植埋棵迷迭香o係側邊睇下可唔可以驅蟲，希望今次可以種到喇！


1/5 雖然之前有幾棵都比D蟲蟲食晒，好彩仲有幾棵仍然鍥而不捨咁生存落去！
今日去到見到有D櫻桃蘿白大個左好多喇！
我諗下個禮拜就可以收起佢地黎做醃蘿白喇 ！好期待~~


3/5 今日終於忍唔到手起左4粒櫻桃蘿白喇！
   

14/5 今日既「種族大清洗」第一名犠牲者出現左喇！
今日終於收埋之前收淨o個幾粒櫻桃蘿白，結果都係無咩大個，個樣仲古古怪怪咁！
由於太醜樣喇，所以都唔記得左同佢影相，唯有期待27/4落o個轉種子可以生生性性啦！

[ 本帖最後由 小女王 於 2008-5-23 07:46 編輯 ]

由於d紅蘿白實在太細棵喇！每次都好難影！
辛苦大家睇住呢d先！依家先知原來種紅蘿白最難既...竟然係影相

21/4幾經辛苦，終於影到一行4傑，大家睇到嗎？

4月21日迷你紅蘿白

24/4 黎個近鏡少少，但係都... 個對蕉唔知去左邊，激死！

4月24日4吋紅蘿白

3/5 隔左一段時間，D紅蘿白明顯大個左好多喇！
   

14/5,21/5 d紅蘿白越黎越靚喇！成日都蘿蘿攣想掘開d泥裝下佢地，
但係又擔心整親唔靚仔，所以都係迫自己忍手！再過多半個月左右應該就可以有收成喇！
  

[ 本帖最後由 小女王 於 2008-5-23 07:53 編輯 ]

由20/3開始用苗盤培苗，到6/4就已經可以即時移苗喇！
到左14/4大家已經企得穩穩陣陣，似模似樣喇！

4月14日3星期的通菜

  

4月14日最強壯的一棵

21/4，雖然岩岩打完風，但係遇強越強呀！
你睇又大棵左喇！

4月21日大大棵通菜

24/4，比起之前已經生得越黎越密喇！唔知幾時先可以收黎食呢？

4月24日通菜森林

   

4月24日通菜森林2

27/4，今日收割左第一輪通菜，等佢地可以再生得密d。
   

3/5，經過上個禮拜收割左第一輪之後，再進一步收割埋其他長大左既通菜，少少地又食住先啦！
14/5，今日「種族大清洗」既第二個犠牲者又出現喇！
由於4月尾收割完第一輪之後直到依家都唔見d通菜有咩起色，而且食落我先發覺完來我唔鐘意食呢隻通菜架！
所以....為左我可以生更多既子子孫孫，最終佢都係被連根拔起喇！
大家可以o係度再睇一睇佢既遺照
  

[ 本帖最後由 小女王 於 2008-5-23 08:02 編輯 ]

一直都好想種蕃薯，一黎因為自己鐘意食，二黎仲包保有得食ma！
因為就算種唔到蕃薯都仲有蕃薯葉食下，包無損失。
所以o係3月尾既時候就去左taste買左不同款式既蕃薯，每款切左d出黎吽苗喇！
初頭只係用水吽，點知吽到發臭咁濟都唔見佢出芽，本來諗住掉左佢地放棄架喇！
諗下諗下又唔忿氣，諗住還掂都要掉咯，不如掉落d泥度睇下有無用啦！
誰不知無乜理佢咁(嘻！即係水又淋下唔淋下，望都唔望下咁呢)，
無端端有一日佢地又開始生d葉出黎喎！認真神奇


14/4見佢地開始有幾塊葉仔，於是搣左d苗落黎正式落落田度種蕃薯喇！
呢度係其中2款！其實我都唔知邊隻打邊隻，總之有得食就ok啦！

4月14日剛移植的蕃薯苗1號

4月14日剛移植的蕃薯苗2號

21/4 已經前前後後移植左5棵蕃薯苗喇！好似款款葉都有d唔同咁。

4月21日增添了家庭成員的蕃薯

24/4 嘻嘻！你無睇錯！其中有棵係扮蕃薯架！你見到嗎？

4月24日莧菜扮蕃薯

3/5 已經霸左成個角落既蕃薯群


21/5 唔覺唔覺d蕃薯葉已經越生越多喇！仍然繼續由佢自生自滅！


[ 本帖最後由 小女王 於 2008-5-23 08:04 編輯 ]

6/4播種既莧菜，其實o係9號左右已經見佢地發芽喇！
到左14/4，已經可以清清楚楚見到一棵棵既苗BB喇！

4月14莧菜發芽了

21/4 d莧菜已經生得密密麻麻喇！終於決定要落手疏苗喇！

4月21日疏苗前的莧菜

由於都係唔忍心...所以疏完之後仍然係密密麻麻

4月21日疏苗後的莧菜

24/4再去既時候，見到佢地實在生得太密喇！所以今次真係無辦法，要一舖清喇！
呢張就係佢地既遺照...

4月24日永別了！我的莧菜苗

27/4 越嚟越大棵既莧菜


14/5 今日大清洗既最後一位犠牲者就係佢喇！不過佢都算功成身退喇！
  
而且仲有咸旦同皮旦陪葬，我相信佢死...都死得好安慰


[ 本帖最後由 小女王 於 2008-5-23 08:10 編輯 ]

由於本人超級極度十分之鐘意芫茜呢種植物，所以o係3月中開始已經o係屋企試種。
殊不知種極都種唔到，仲種到d種子同泥都發埋毛，但係連1棵苗仔既蹤影都無
但礙於我有呢個「死唔斷氣」既習性，到左今日！24/4！終於都有出頭天喇！
我係話d芫茜！唔係我！哈哈！

呢棵係其中一棵o係塊田度生出架！其餘陸陸續續仲出緊好多棵！
實在好開心呀！我相信不久既將來我就可以食到好多好多既芫茜喇！
因為我差唔多成幅地有空位既地方都撒左芫茜種子！

4月24日新加入的芫茜

27/4 今日見到塊地好多地方都開始長出芫茜喇！
不枉我之前落左咁多種子！奸爸爹呀！
   

3/5 D芫茜靜雞雞咁生到四圍都係喇！
   

[ 本帖最後由 小女王 於 2008-5-4 09:47 編輯 ]

未有相提供，因為本來之前撒左種o係田度，而d菜心亦都好快咁發芽長苗，
但係由於我塊地太多寵物喇！所以d菜心苗亦成為左佢地既早、午、晚餐同宵夜！
本來我都已經將d菜心除盡諗住放棄架喇！
點知呢幾日o係屋企發現d苗盤唔知點解又長左d菜心苗出黎，
應該係我o個陣落芫茜種子o個時落埋落去既，咁見佢地既然咁頑強，
我唯有比多一次機會佢地啦！o係24/4就將5棵既菜心移左苗落田度喇！
不過由於數量太少，少到我唔記得左同佢地影相
如果我下次落田既時候佢地仲健在既話，我先再補返d相啦！

27/4 失敗的菜心....今次去到見到仍然係比蟲食晒d葉，
唉，我諗下次再落田佢仍然無咩改善既話，我就判佢死刑喇！


3/5 今日終於將D菜心連根拔起喇！我諗下次都係等岩時候先再種啦！
永別喇~~~~~菜心~~~~~~

[ 本帖最後由 小女王 於 2008-5-4 09:50 編輯 ]

呢棵南瓜苗係o係12/4落種培苗架！

3/5 今日已經正式移苗加入我地既大家庭喇！掌聲鼓勵 ~~~


14/5 唔知點解棵南瓜有d黃黃地咁


21/5 明顯長大左但係面色仍然係唔太好，不過唔知係咪有花lum出緊黎呢？
   

[ 本帖最後由 小女王 於 2008-5-23 08:14 編輯 ]

其實o係3月尾既時候都曾經落過種培苗，可惜...全軍覆沒。
今次再接再厲，希望可以成功培苗啦！

3/5 d種子經過琴晚浸左一晚，今日正式落田喇！
   

[ 本帖最後由 小女王 於 2008-5-4 10:09 編輯 ]

3/5 一齊落種培苗既西瓜同辣椒都長出幼苗喇！
21/5 見塊地有返d空位就將佢地移埋苗落田喇！希望佢地快高長大啦！
   

[ 本帖最後由 小女王 於 2008-5-23 08:19 編輯 ]

多得呢班「寵物」，實在為我增添不少園耕樂！掌聲鼓勵

首先係1號佳麗 ～ 狗虱仔(我稱佢為「虱仔」，咁樣好似親切d)
阿虱仔係o係21/4黎到我屋企架！但係自從o個日我餵左佢飲左d自製蒜頭水之後佢就離家出走喇！
以下係阿虱仔離家前有關既資料：
衣著：身穿黑色外套，背部有黃色條斑，身型細少，約有3亳米左右。(詳見相片)
興趣：喜愛像虱一樣跳黎跳去
習性：最愛嚼食葉片，形成許多小圓孔。
常去的地方：多數逗留於十字花科的幼苗
我依家o係度呼籲大家，如果有人見到阿虱仔既蹤影既話，請與我聯絡！
重酬！(酬金係廿只狗虱仔，仲可以免費送貨添！ )

寵物1號..狗虱仔

2號佳麗就係雀仔既最愛 ～ 肥蟲同孖蟲twins
係咪好肥美呢？無法啦！佢一餐早餐就食晒我d蘿白葉咯，點會唔肥丫！
由於我驚佢地淨食蘿白葉會覺得悶得濟，一陣好似阿虱仔咁發脾四離家出走就弊喇！
所以我今日去探佢地既時候，專登帶埋d蒜頭水去整蒜頭蘿白葉比佢地食！
希望佢地食得開心啦！

寵物2號...肥蟲

寵物TWINS...孖蟲

27/4 今日見到肥蟲又肥左喇，而孖蟲其中一條蟲就去左玩風車，見佢玩得咁開心實在令我好唔安落，
查實...今日就係佢地既死期喇！因為今日我老公都有落田，所以永別喇~~~肥蟲&孖蟲TWINS！
   

另外3號佳麗就係佢地喇 ～ 蟻1,2,3,4......n
佢地好叻架！我掉d種子落泥，佢地就會一齊跑去執起佢！
不過就唔係比返我囉！係攞返去個竇度收埋囉！

寵物3號...蟻仔

研究左一輪呢條係「蜈蚣」定「馬陸」，最終估計相信應該係「馬陸」黎架！
佢地2者既分別就係蜈蚣每節只有一對腳，而且蜈蚣係益蟲，會去食蛞蝓及其他昆蟲；
而馬陸每節就有2對腳，而佢係會食農作物既幼苗 請大家認住佢地個樣！
我由開田至今成塊地都有好多出沒呀！ 不過好似又唔多覺佢地食幼苗喎！


另外3/5有新發現，o係棵苦瓜上面有只疑似「盾蝽」/「飄蟲」既昆蟲，
不過研究左好耐都搞唔清究竟係邊種 ，如果有人知道可以話我知嗎？
其實佢個形態就似盾蝽，但係顏色就似飄蟲。
不過2者既分別就大喇！一只係害蟲、一只係益蟲！
盾蝽係會吸食物既汁液，同埋會o係喙上携帶真菌孢子，傳染病害架。
而飄蟲相信大家都知道，佢地係會食d害蟲架，包括：蚜蟲、介殼蟲、小臭蟲同小毛蟲。
   

[ 本帖最後由 小女王 於 2008-5-4 10:37 編輯 ]

24/4 古惑的貓
其實好耐之前都見過佢幾次架喇！不過因為我同老公都好鐘意貓既，所以對佢都無咩特別反感！
點知今日竟然比我見到佢既惡行！實在人人得而朱之(<--我都知寫錯字架喇！不過真係唔識寫)
入返正題。見到呢3幅相....相信聰明既你地已經估到佢o係度做咩喇！
但係愚笨既我...最初仲好好奇咁o係度諗，點解只貓會幫o個塊地既主人翻土既呢？唔通佢養既？
我仲諗住將佢翻土既過程拍低，話唔定可以上電視
殊不知我走近一睇.....完來佢o係度開大呀
雖然我最終都趕走左佢，但係我相信同一個動作佢已經做左唔知幾多次喇！
可憐塊地既主人.....唔知幾時先會發覺自己塊地有人幫佢施肥呢？希望我下次可以見到佢話佢知啦！






3/5 今日四圍去巡視既時候發現其他園友既防雀工具都幾得意，所以影黎同大家分享下！
   

21/5 今日去巡視既時候見到人地好多都開始有瓜BB同收成喇！
  
  
另外仲見到有個搞笑既製成品！實在嘆為觀止呀！勁！


[ 本帖最後由 小女王 於 2008-5-23 08:24 編輯 ]

很有心機啊...咁詳細既種植過程...鬼馬的小蟲

好過癮
好似打3國誌
好詳盡的描述
好多蟲的田
是否你旁邊的田友多蟲呢?

毛毛蟲有一點恐怖.....但菜一定好吃的

個田圖係綠田園o個邊教咁畫架！
因為我工作上既緣故join過佢地一d有機耕種既計劃！
對我呢d新手整左之後先落田企理好多。

我又無咩特別為意其他田多唔多蟲喎，因為其實大家都好似仲未有咩種野咁
(你睇最後影貓貓o個d相就見到！)
反而大家已經做好晒準備，搭好晒棚。

其實d蟲真係幾得意架！
我頭先先同老公研究不如買棵菜心養起條蟲佢
講真我都唔係咁忍心殺佢地，所以好彩耕田唔係我正職姐，
如果唔係實蝕死我！耕田變左養蟲