水母攪洗衣粉

大家玩左打皂咁耐, 有無剩了一堆皂雜碎?
以前我會用這些皂碎洗衣, 後來發現皂垢頗多, 個個月月要清潔洗衣機, 真的很煩.

如何可以環保又能減少皂垢呢? 找了一輪資料, 似乎懶人都要為環保做下野喇. 皂皂都要清理, 清除皂裡容易形成皂垢的甘油和雜質!

手工皂洗衣粉~~~~

準備工具和材料:
1. 刮刀 (不用利)
2. 手動攪拌器
3. 刨
4. 皂碎 (這個當然了~)
5. cheap cheap 鹽 (max. $2/250g)
6. 鐵鍋一大一小, 膠桶 (最好透明)
7. 小蘇打粉 (批發好平架, 唔好去超市買喇, 貴幾十倍~)
... 差不多啦, 其餘請睇相~~


程序:
@整個過程, 其實是利用"鹽釋法", 利用飽和鹽水與皂的化學反應, 抽出皂中甘油, 呢個過程會分離甘油和皂, 同時在溶皂過程, 添加的植物粉和色粉比皂較重, 所以會沉於水中, 成為不會生皂垢的皂!!!
@假設有1kg 皂, 我會用1kg 飽和鹽水浸皂, 飽和鹽水的比例是 水:鹽 = 4:1 or 25% - 30% 鹽. 今次我用1kg 水: 250g 鹽 (因為一包鹽250g, 唔洗量喇~ 慳時間~~)

看圖吧~
1. 先乖乖去刨皂成, 越碎越易溶 (即係好似再生皂咁玩)~ (我最討厭的工作!)


2. 煮滾水, 倒1kg 滾水與皂一起座溶, 用大刀不時攪, 攪呀攪... 記得小小小火座熱, 否則會煮燶皂, 害了煲仔呀~~~
3. 為了方便大家睇清楚整個過程, 水母在不同情況把皂水倒入透明桶, 呢下真係好攪工~


4. 煮到皂溶了 (其實應該要再溶d, 但我真係幾懶~ 手倦了~) , 下鹽, keep座熱和細細力攪皂... 嘩... 好多色皂, 證明我的皂也很花心~


5. 看, 一堆x 水... 鹽溶盡, 皂也溶溶地, 手倦, 係時候等鹽自己做野, 放佢埋一邊靜止15-20min.


6. 20min 後, 鹽水較重, 逐漸地, 較輕的皂浮起了, 甘油和雜質沉了下來.


7. 用篩慢慢撈起水面的浮皂, 倒掉污水.


明明溶掉的皂"肉", 現在很原整啊~~~


鹽釋法一次當然唔夠, 一般要做幾轉, 直到水清為止.

8. 好, 繼續煮滾水, 第二輪鹽釋法開始.
由於今次皂裡已經有鹽, 本著慳家和實用原則, 今次只加150g 左右鹽, 水也不用1kg 咁多, 因為皂已經很濕, 較重的雜質也洗走了, 水用 700-800g 已夠喇~

又要座溶皂糊... .. 今次好多泡... 可能少了甘油, 很易起泡~


9. 放涼靜止, 靜待佳音.... 重覆以上步驟.... 到第四次, 肚餓, 去左食 dinner, 1小時後回來看... 嘩...
厚厚的皂浮在水面! 水清了不少~


第四次鹽釋後, 皂皂已經溶得九九十十, 也變得白淨很多.


看看污水桶的底部, 之前做皂的色粉沉底了~


10. 懶, 見皂白淨左咁多, 算喇, 收手, 家下做洗鹽工作, 免得皂含太多鹽, 變成海水洗衣.
煲700g左右水, 大滾後闗火, 放皂, 用大刀輕攪一會. 待片刻. 因為皂中還有鹽, 所以皂還是會浮起.

11. 找一件舊衣 (我拿了男丁的上班上衣~~ 哈哈~~), 放在透明桶面, 把皂倒進舊衣面, 隔水.


12. 水很清啊~~  待多一會, 讓更多的鹽和雜質溶於水. 然後拿起舊衣, 皂皂就乖乖的睡在舊衣上.

似唔似嘔吐物, 呵呵~~~


13. 最後階段, 晾皂時間, 我放了皂皂在窗邊晒太陽, 冬天很適合製作洗衣粉, 天口乾又有陽光...


14. 等呀等, 隔天記得翻一翻皂, 整碎一點, 讓皂易乾. 這個程序也等上2個星期呢~~ (可能最近天口不乾燥)~  
看, 2個星期了, 皂碎了很多. 全乾了.


15. 為了洗衣時溶皂快, 皂皂還要入攪拌機打磨成粉, 啊... 真攪工.


記得不要攪太耐, 太耐會製熱, 令皂溶成一舊架~~~


16. 最後最後喇, yeah~~~ 就是混合小蘇打粉和皂粉, 一般比例是皂: 小蘇打 = 1:2 or 1:1.5, 由於水母無乜汗味, 所以用了1:2.
懶人做法, 用視覺量度, 不用續樣磅, 大家睇得明嗎?


關好洗衣盒, 翻動它一輪, 皂粉混合小蘇打粉, 完成!  (明顯睇到有些皂粉很大粒..... 嘻.... 懶人的結果~~)




多謝收看~~~~~  

仲話係懶人，貢繁複工序，虧您有咁毅力，讚
仲有，咁早回？

jellyfishy  一早回家做家事喇~ 謝謝你來做觀眾啊~~~  發表於 40 秒前

我唔係觀眾，我係朝聖！

皂就有，碎就無乜，況且我無你咁有心機

咁大工程

prodorothyhkg 發表於 2012-1-11 23:15
咁大工程

真係好大工程啵

我知道皂在硬水裏洗會有皂垢，睇完水母咁整之後仍是不大明白所以然，不過最担心是鹹水洗衣會令洗衣機生鏽

孖吉 發表於 2012-1-12 00:17
真係好大工程啵  

我知道皂在硬水裏洗會有皂垢，睇完水母咁整之後仍是不大明白所以然，不過最担心 ...

見到好多台灣手工皂朋友都有自製洗衣粉, 話會少d 皂垢, 所以我想實驗下. 昨晚洗那件男丁舊衣時, d 泡泡好白好多, 洗感好似平時用的洗衣粉, 要沖幾次水才清乾淨.
有人甚至會加eo 入洗衣粉, 不過我無加, 洗到尾件衫唔會留有香味, 唔想浪費~

Dear CK,

機洗呀～～

我以往洗衣, 就咁溶手工皂混合小蘇打粉算數，通常會令機內多了些啡色小塊，好似腐葉响機內攪碎左一樣，一個月要清機一次，淨落小蘇打浸機過夜，然後攪幾下，用魚網撈走個ｄ”腐葉”～　

以前未試過塞渠．今次轉用手工皀洗衣粉，應該都唔會塞渠掛～

我曾在某個網站見過教整洗衣粉。工程繁瑣不在話下，覺得要煲來煲去和加那麼多材料，並不化算。若怕有皂垢影響洗衣機，我就會將皂碎全用熱水泡溶來洗碗算了。

我平時唔煑飯，無乜碗洗架～　 所以手工皂洗碗呢．．．一舊家事皂可用四個月！　係咪好誇？

但因為我成日打波，較多洗衫機會，一星期會開四至五日機，所以用皂量較大～ 自從唔用市售洗衣粉洗衫，男丁個身無甩皮～　自從迫男丁用”巴”王洗頭水，佢就少左好多頭皮，以前佢ｄ頭皮係一塊塊架，好核突～　我試過捉實佢（真係捉實隻狗咁捉）個頭，用我的手工皂洗頭，個日佢完全無頭皮，可惜佢始終唔肯用我的皂洗髮，嫌煩和唔信～　   

慘喇～　用左手工皂，真係番唔到轉頭～　

唔好意思,想問問水母:

你以前用含甘油的皂要過幾次水?
有甘油同冇甘油洗出泥係咪都差多?

我想整洗衣皂(手洗),所以問問

杳杳然 發表於 2012-1-12 11:34
唔好意思,想問問水母:

你以前用含甘油的皂要過幾次水?

手工皂含10%左右甘油，甘油會吸水，如果吸住ｄ水係污水，就變左做皂垢～　仲有一堆唔知乜鬼半脂肪酸和色粉，都會吸住污物，變成污垢，我係知咁多～　

機洗我一般會過3 - 4次，視乎衣物量和污衊程度．冬天一般３次算ｌｕ～　

用鹽釋法去除手工皂內的甘油／半脂肪酸／色粉，etc... 理論上洗衣時應該少好多皂垢～　我啱啱試用手工皂洗衣粉，淨係知佢似以前的洗衣粉，無咁易溶，也不會變gel狀．相反手工皂易溶好多，和吸水後會gel gel地．

你當你有１kg 皂碎，攪一輪後，加小蘇打粉，共有約3kg 洗衣粉，唔知你地用幾耐呢？　我呢，每次洗衣約一匙，大約20-30g，即係用到100次～　

我無乜體味，唔知呢ｄ方法啱唔啱有體味的人．

如果體味大的人，可能要過多次水，或最後過水時加eo，睇下有無去味功效？

小疏打已可以去體味

用小梳打和清水洗衫已經好乾淨。

除非衫上有特別的污跡，咁入機洗之前用皂濕水洗咗污跡先。

做咁多工序，不如把皂碎再生。

prodorothyhkg 發表於 2012-1-12 12:14
小疏打已可以去體味

其實你有無叫體味大的人試過？？

我打波用爽身粉，是小蘇打加eo，點會唔知佢可以吸味．但是否一樣攪得掂體味大的人，我不清楚喇．

舊男友體味很大，我以前用洗衣粉也去不掉他的味，更不用說小蘇打了．佢話洗唔乾淨，洗完好似無洗過咁喎．

八王爺 發表於 2012-1-12 12:24
用小梳打和清水洗衫已經好乾淨。

除非衫上有特別的污跡，咁入機洗之前用皂濕水洗咗污跡先。

咁你現在係咪清水洗衣?

我現在的確機洗之前用皂濕水洗咗污跡先～

皂碎再生，還不是一堆皂，還有那些壞掉的皂，再生了也不想用在身上，用在身上又用不完，又唔靚仔唔送得俾人，所以用來洗衣囉．

我都有用皂碎洗衫，學你一樣，先用熱水泡到變皂液，洗時加小蘇打。洗完都不覺部洗衣機有什 麼骯髒的東洗沾在內桶。我很久以前就習慣每次洗完衣物取出後就用毛巾抺乾內桶內的水跡。
隔三差五就叫老伴將個隔垃圾的隔取出清洗，現在用皂洗衣也不見有什麼特別的骯髒物。
我用家事皂加皂碎洗碗的用量也頗多的。不明何解晚晚都好似請客一樣多碗碟.........

claudiatang 發表於 2012-1-12 14:06
我都有用皂碎洗衫，學你一樣，先用熱水泡到變皂液，洗時加小蘇打。洗完都不覺部洗衣機有什 麼骯髒的東洗沾 ...

我以前用市售洗衣粉，無污垢問題，但用手工皂洗衣後，就有此問題．有時一個月無洗機，ｄ衫洗完會貼實左啡色一塊塊的污垢，要用膠紙貼走．我看很多台灣手工皂友也曾遇上這問題，所以才會研究手工皂洗衣粉．

不過講開又講，我部洗衣機好cheap，三年前買不用$2000（係咪好平？）個污垢隔好掂，隔唔到污垢的．所以用手工皂洗衣後，要定時用魚網網皂垢囉～～　好低ｂ～  
我部機fing水後無水係機內架，其實佢fing 水都幾勁，ｄ衫都算幾乾下～　

你可以用皂碎洗碗，如果我ｄ皂碎用來洗碗，幾年都用不完～　

jellyfishy 發表於 2012-1-12 14:15
我以前用市售洗衣粉，無污垢問題，但用手工皂洗衣後，就有此問題．有時一個月無洗機，ｄ衫洗完會貼實左啡 ...

我洗衫的皂碎都要挑選過，有備長炭或深色粉的都用來洗碗。