本帖最後由 freddywongdy 於 2020-8-3 17:37 編輯
記得有一次同 K, L, T 佢地去大拗門 BBQ,
K 講起一件幾令人毛骨悚然o既事...
我地一班人圍住燒野食,
當日人唔多, 有好多爐無人用,
唔知講起咩笑, 我話... 你地睇下o黎處幾多人!
(其實附近得兩三個爐有人燒烤中)
坐响隔離爐D人望住你呀...
K 即時眼勵勵咁話: 荒山野嶺, 唔好亂講野呀下!
我: 日頭白白! 你怕有鬼咩!
L: K 已經有一隻响你則邊啦!
(當其時我係坐 K 隔離)
我: 你先係鬼! 哈~~
K: 都話咪講咯!
我: 咁驚做乜鬼喎!
K: JJ上次燒完野食返黎講左件事比我知...
我驚到而家呀!
L: 咩事呀? 撞野呀?
T: 講你就講啦!
K: 頭先行入黎咪經過個涼亭o既...
佢地响果處見到野呀!
我: 下~! 頭先果個?
K: 係呀! 等你頭先仲話入去坐下喎!
唔叫住你就走左入去啦!
我: 吊! 又唔早D講! 咁 JJ 佢地入涼亭見到野呀?
K: (K 眼勵勵勵實我) 唔... 佢上次同班朋友一齊黎, 佢朋友揸車喎!
其實佢地都唔係好識黎o黎處... JJ 話, 架車駛到入黎,
去到涼亭附近咪有小小空地可以泊停架車o既!
T&L : 係吖!
K: 佢地唔知行過D, 行入黎就有燒烤爐喎!
以為去錯左地方! 咁咪泊左部車响涼亭果個空位囉,
出面路口咪有兩間士多o既!
我: 係呀!
K: 咁佢果個揸車o既朋友話費事又要駛架車出去,
佢行出去士多問一問人.
就係o黎個時候, 坐司機位隔離另一位女性朋友就話...
嘩! 行返出去都成個字呀! 不如問下涼亭果兩個人知唔知啦!
K: JJ 話, 當其時其實太陽開始落山, 果處D樹又高又密喎!
佢其實望得唔太清楚嫁, 佢仲話黑掹掹邊處有人呀...
不過都覺得奇嫁啦! 我講完之後, 成架車都無其他人出聲喎!
跟住揸車個朋友就即刻開車駛走, 改左去獅子山郊野公園燒野食啦!
K: 後尾 JJ 話問返佢D朋友, 果晚其實係咪見到...
佢話果晚見大家都唔出聲就轉地方燒野食都知有D野,
司機朋友話, 你唔見我地响倒後鏡打晒眼色嫁咩!
剩係得佢見到姐嘛! 佢成日都係咁嫁啦!
大家都知佢成日都見到佢地見唔到o既野嫁啦!
我見你地唔出聲我都唔敢出聲問呀......
我: 咁恐佈...
K: 唔係你估! 等你仲係唔係都走入去坐啦喎!
我: 不如我地一陣出返去睇下果處有無人吖... 哈~~
K, T, L: 你自己走去睇啦! 黐線!
我: 駛唔駛咁齊呀!
PS. 夜晚燒完野食行返出去, 見到個亭黑沉沉咁... 又真係幾恐怖!
隔離空地已經長滿左參天巨草, 倍添陰深......
<完> |
提升卡
置頂卡
沉默卡
喧囂卡
變色卡
顯身卡
