尼泊爾同事 a 講嘅奇怪事 pt.1 大腳怪

記得之前同舊公司個尼泊爾同事傾開計...
因為知道佢住得幾近喜馬拉雅山附近,
我就想起 雪人" Big Foot" o既傳聞...
我: 好多爬山o既人都話見過 雪人 喎!
a: 其實唔止係喜馬拉雅山先有!
其他地方都有嫁! 有D仲會行得好近村附近偷野食...
a: 我爸爸見過兩次! 有一次仲係我同佢一齊見到...
仲好近我添...
我: 嘩! 有幾近呀!?
a: 有日同爸爸去完河邊放羊,
沿住返屋企條路有好多好高o既蘆葦草!
仲高過我爸爸嫁! 果陣時我都係到佢腰咁上下...
我: 照咁講D草應該有十尺啦!?
a: No no no! 起碼十二尺!
我: 咁高!?
a: 係呀!
爸爸拖全我一路行, 見到側邊D蘆葦跟住郁囉!
我好驚咁拍爸爸隻手...
我地停底左落黎, D草跟住停底左...
我: 跟住有隻野走出黎!?
a: 唔係呀! 我地見到草入面有對眼望住我地!
好高嫁! 差唔多有D草咁高!
我: 咁高!? 咪好大隻!?
a: D草遮住睇唔清楚! 不過記得佢成塊面係毛,
對眼好惡咁望住我囉...
我: 咁你爸爸緊係拖你即刻走啦!?
a: 唔係呀! 我爸爸好惡嫁! 佢執起地下D石掉個頭!
我都有掉!
佢叫左一下就向草叢入面走左去勒!
跟住爸爸先抱住我走返入村!
我: 又會咁細膽o既!?
a: 係呀! 未聽過佢地攻擊人呀!
我: 咁另外一次佢點見到呀?
a: 果次我爸爸去另一條河邊, 離遠見有隻响處捉魚呀!
我: 果隻係黑熊黎炸嘛!?
a: 唔係啦! 我地果處得細隻果種! 邊有咁大隻!
仲有熊係用四隻腳跑, 佢係直立咁走左去嫁!
佢地聽覺好犀利嫁! 離好遠都聽到有人行近就會走嫁!
我: 咁之後仲有無見過呀!?
a: 無啦! 不過有其他人見到囉!
其實佢地有好多嫁! 不過D人唔當係咩一回事啦!
我: 咁又係! 佢地有自己生活方式啦...
咁除左o黎樣之外, 仲有無D古怪野講比我知呀!?
a: 當然有啦! 下次食飯再講比你知......

<待續>