請問哩兩棵蝴蝶蘭係咪瓜得

之前新年買嘅蝴蝶蘭謝左就攞起兩棵來自己試下種，完全新手，睇youtube同哩到之前幾篇急救文章來學野
哩排出左狀況，所以睇下有無大師可以指點下，或者已經無得救

第一棵
買左新嘅水苔換左哩棵，中間有睇教學
將爛根清左再裸根一日就落新水苔，放入已經整好窿嘅膠盆，再浸水半小時，擎乾之後擺入另一個密封花盆就無理過佢

之後過左大概半星期到一星期，發現好似有爛根同黃葉，就即刻拆水苔，應該係之前浸水太濕，同埋裝落個密封花盆唔夠通風就爛曬D根，D根幾乎無曬，同埋莖發黑，噴左花寶藥水
再裸根左一日，之後而家都係夜晚浸茶水，日頭裸根
但唔係好知道點搞，佢咁啱有生緊嘅新根，可能要靠條新根，不過而家葉都係繼續黃緊，如果甩曬係咪無得救

而家狀況可以睇頭3張圖


第二棵
哩棵比之前果棵仲遲處理，係新年個花盆羅出來，擺左係到之後幾日先搞，中間已經唔知有幾日係無淋水
之後拆開換水台時候發現個莖幾乎全部黑曬，D根雖然好長好健康，但係睇過如果莖腐 應該係好難救
而家D根係由上面開始爛起，而且D葉黃得好快，本身有塊葉已經裂開，再無葉就唔知點算啦

之前已經刮走D黑色 同埋同樣都係噴花寶藥水，裸根一日，再夜晚茶水，日頭裸根
不過都係keep住係咁爛根同黃葉
哩棵感覺狀況仲差，因為完全無新根，都唔覺得有咩生機


咁樣已經持續半個星期，其實仲有咩好做，定係都係keep住夜晚茶水，日頭裸根，還是要落催根藥或者肥料？

如果唔係爛入心應該仲有得救，
比我就剪晒d爛根清理好，
用揸乾水嘅濕水苔包住，
放入透氣膠盆引根，
放去通風光亮地方就得，
而家哩d溫度最啱蝴蝶生長！
希望救得到啦！

freddywongdy 發表於 2020-4-25 20:10
如果唔係爛入心應該仲有得救，
比我就剪晒d爛根清理好，
用揸乾水嘅濕水苔包住，

多謝呀師兄，但係呢 D爛根我已經盡量清理啦，係咪仲可以清埋碎濕濕果D根？
可能可以試下你個方法！ 多謝指點呀！

lcm1107 發表於 2020-4-25 23:18
多謝呀師兄，但係呢 D爛根我已經盡量清理啦，係咪仲可以清埋碎濕濕果D根？
可能可以試下你個方法！ 多謝 ...

我棵白蝴蝶前排d根爛晒，
一把火比我剪晒根包水苔彬皮重種，
基本上無乜野佢都會乖乖生根嘅！

我會建議你轉水氣栽培，用60%遮光，高通風，唔好用肥，見白先用噴壺噴濕，應該係軟腐病，建議唔係變黑同變軟就唔好剪根，黎緊應該會黃葉同不停爛根，切記唔好長時間浸水，就算想用植料都唔好濕多過一日，兩個星期就知會唔會瓜

dragonkinght 發表於 2020-4-26 19:24
我會建議你轉水氣栽培，用60%遮光，高通風，唔好用肥，見白先用噴壺噴濕，應該係軟腐病，建議唔係變黑同變 ...

師兄 你講得好啱 而家已經各自爛剩2塊大葉
無乜根果盆 而家用緊水培 用水繩吊住條新根 希望新根生得快D
暫時好似無再惡化

另外果盆仲繼續爛根，我會用你講嘅水氣栽培，好似幾好
但要搵啱用嘅盆，同埋屋企係室內未必做到高通風，但都會試下！

感謝指點！

freddywongdy 發表於 2020-4-26 17:32
我棵白蝴蝶前排d根爛晒，
一把火比我剪晒根包水苔彬皮重種，
基本上無乜野佢都會乖乖生根嘅！

哇 你咁大膽 我唔係好敢呀
而家情況好似唔係好差，我轉水培、水氣試試佢先

感謝分享呀！

其中一盆最近開始生葉啦！ 哩個已經係之前影落，而家嘅葉有再大Ｄ
就係得返一條新根果盆，用左水氣法真係work
不過根就無再長同無新根


我水氣法係咁整，因為唔想再去買陶粒，所以就用紙巾鎖住水氣

歡迎新花友，救花正是學習的好時候。