薑汁年糕(附食譜)，好似冇人貼過？

我見"為食貓"有年糕食譜就跟住整左次，之後我改左些少整左個過年用。

薑汁年糕
8吋圓盤

材料
糯米粉         300 克
澄麵        65克
片糖        250 克
薑汁        30 ml
清水        390克
生油        1湯匙

1) 片糖加水及薑汁煮溶，再用篩格去雜質
2) 糯米粉+澄麵過篩篩勻
3) 待(1)降溫至唔燙手，倒入(2)混合，用手拌勻及盡量"卒"溶粉粒，往同一方向邊"卒"邊攪拌(攪到冇粉粒都有攪拌到15分鐘左右)，之後過一次篩
4) 加入生油到(3)中拌勻(我用花生油)(如果洗左手就可以用筷子之類的攪拌)， 將粉漿再過一次篩
5) 粉漿倒入掃滿生油的8吋圓盤，水滾放入鑊用大火隔水蒸15分鐘後可以收中高火繼續隔水蒸45-50分鐘，筷子插入糕中再拔出冇粉漿黐筷子就OK了。
(蒸成個鐘或以上，鑊中水最好盡量多，水面接觸到盤底都可以，若果加水就只開蓋一個細口倒入滾水，盡量唔好放走蒸氣)

年糕剛蒸起會好軟身，放涼後會變硬切得到，雪凍會再硬身D。

梗係無人貼，因為唔知加咗薑汁好唔好。
我個人未食過辣的廣東式年糕，或者試下 煎完加薑汁？

我上面加薑汁的份量唔辣，不過食到+"聞"到有薑的香味，另外我上面食譜已經減少糖的份量。

我爸媽初初知我要整年糕，又話麻煩整、又話唔好食、又話材料費加時間買個仲好、又叫我唔好加薑汁整傳統年糕…
第一次整果個用490-500ml水，薑汁同糖份量同上面一樣，整出黎變成糯米糍，佢地都話好食，幾日食晒。
我鐘意食年糕，就係唔鍾意出面賣的年糕太甜，自己整可以較甜度同薑味。

下面lee個係第一次整的薑汁年糕，雪到第3晚先切得到，熱左都係要用較剪剪…

咁即係太「削」，意頭不好。