鹿鳴春

要吃正宗北京菜，非鹿鳴春莫屬。老字號鹿鳴春位於尖沙嘴麽地道，看看門面招牌就知老成點，裝修雖舊式，但環境衛生，檯椅食具放置整齊。老字號經得起時代考驗，一絲不苟，實而不華就是賣點。舊派食店，估都估到部長和待應個個都係性格巨星。唔好誤會我有貶意，佢地其實係忠嘅，效率高，健談，會給你意見，但通通是為你嘅荷包和健康着想，我就一萬個受落。不過，晚飯訂檯起碼要在十天前，即興摸上去免問。

周末一行七人去鹿鳴春吃晚飯，叫了以下菜式：
沙窩雞燉翅、片皮鴨、清炒河蝦、糟蒸鴨肝、和菜戴帽、京燒羊肉、义子燒餅。
菜式保持一貫高水準，食味一流，分量十足。本想叫多個甜品高力豆沙，也要打消念頭，因為實在食不下了。

全場滿座，稍嫌喧鬧，上菜效率奇高。我也知他們想做多轉生意，一小時半後識做地快手埋單，待應猛講招呼唔到，我條氣好順，也祝他們生意興隆。

消費：$1,430 (人均消費：$205)
得分：8.5分 (以10分為滿分)

注意隨時有特別嘉賓，包括蔡瀾、蕭芳芳、Amanda S、楊森等陪你同場食飯。李翰祥生前也常光顧。即使你不好京菜，但價錢仍算大眾化，抱着「朝聖」心態幫襯下都值得。

沙窩雞燉翅：必食，一睇d翅咁粗一梳梳，唔駛我多費唇舌形容點正法。用饅頭點湯伴飲幾特別。




片皮鴨：必食招牌菜，師傅刀法一流，每片有皮有肉，我鍾意。




清炒河蝦：好鮮甜，啱廣東人口味。西人可能較喜歡宮保或芝麻炸的蝦。我認為靚蝦無妨清炒食真味。

糟蒸鴨肝：以前要預訂，現在來貨少，變成冇得訂，即場碰運氣有冇貨。有運有貨就要試，幼滑甘香，正過法國鵝肝。但高膽固醇，叫細碟試少少就夠了。


和菜戴帽：很好，賣相佳，清爽家常菜。和菜是綠豆芽、蘿蔔絲、雲耳絲、筍絲、豆乾絲、豬肉絲、米粉等，帽子是蛋皮蓋面。


京燒羊肉：必食，香脆中帶少肥，肉質嫩滑，有羊肉香味，但冇羶味，就係咁神奇。


义子燒餅：好香好脆，d芝麻引死人，配和菜戴帽/京燒羊肉食。


我全部叫細份，也飽到不能吃高力豆沙，有些遺憾。下次精d，約多d人食可以食多幾款。

[ 本帖最後由 Agnes 於 2008-8-10 23:39 編輯 ]

嘩...  好正呀

OH~ my favourite!!!
每次去到都會叫高力豆沙和 畢絲香蕉,
呢兩度菜最難係要炸但又唔會有油沾住個面, 又要無油味,
高力豆沙蛋白面鬆軟乾身, 豆沙唔會太多太少或走了出來,
畢絲香蕉要個面脆無油, 炸時唔可以令香蕉過熱溶掉,
暫時係其他地方都食唔到呢個水準.

佢個片皮鴨就係一試傾心啊!
師夫好 pro, d 鴨又夠肥又滑, 好掂.
反之貴得很的北京X, 居然找些唔熟手既傳菜切, 切到好似燒味店切燒鵝，唉~　真係好失望．　X

原帖由 kim 於 2008-8-11 08:55 發表
OH~ my favourite!!!
每次去到都會叫高力豆沙和 畢絲香蕉,
呢兩度菜最難係要炸但又唔會有油沾住個面, 又要無油味,
高力豆沙蛋白面鬆軟乾身, 豆沙唔會太多太少或走了出來,
畢絲香蕉要個面脆無油, 炸時唔可以令香蕉 ...

我以前在鹿鳴春食的是拔絲蘋果。最後上台時，師傅把糖粉面炸香的蘋果在冰水過冷河令糖面香脆這招，真係好似李寧點聖火咁歎為觀止。蘋果較香蕉有咬口，冇咁甜，帶微酸，仲醒胃， kim可試試。

噢! 好懷念果陣時响附近返工o既日子!
有時食lunch都會去鹿記, 晚飯就更加食唔少,
不過近年去食已經無以前咁好食咯! 可以口味唔同左啦!
不過見你叫D野食咁正, 心郁郁想去添!

原帖由 kim 於 2008-8-11 08:57 發表
佢個片皮鴨就係一試傾心啊!
師夫好 pro, d 鴨又夠肥又滑, 好掂.
反之貴得很的北京X, 居然找些唔熟手既傳菜切, 切到好似燒味店切燒鵝，唉~　真係好失望．　X ...

同意呀！一睇見師傅個樣就知 pro 啦, 見慣場面, 任映唔嬲, 刀法如神.
我喜歡皮+肉的切法，薄餅皮厚薄適中(不太薄)，能飽肚，青瓜段和葱段粗幼適中(有些食肆竟切成絲，唉！), 真材實料，才$280，抵，must eat.

呢間野我都去過,講真真係好食囉

原帖由 freddywongdy 於 2008-8-11 10:16 發表
噢! 好懷念果陣時响附近返工o既日子!
有時食lunch都會去鹿記, 晚飯就更加食唔少,
不過近年去食已經無以前咁好食咯! 可以口味唔同左啦!
不過見你叫D野食咁正, 心郁郁想去添! ...

我覺得冇變到, 只係生意更旺, 管理方式更 pro.
我十幾日前預訂, 接電話的叔叔多謝前, 多謝後. 當日上午可能驚我唔記得，confirm後又多謝前, 多謝後. 叻過好多酒店.
Freddy再去食吖, 你會見到從前的待應和部長, 樣子冇乜老到, 勾起很多回憶架！

小白, 羊咩咩都去食吖.
唔想 book太耐, 食 lunch 都一樣好.

片皮鴨同個翅好好味! 多謝Agnes推介.

原帖由 kwanyeehui 於 2008-8-11 11:03 發表
片皮鴨同個翅好好味! 多謝Agnes推介.

早晨, 鈞哥！
我鍾意 DIY, 但片皮鴨同個翅真係正到 DIY唔好,
得閒約 d 弟兄姐妹上去食野傾計分享都好好

原帖由 Agnes 於 2008-8-11 11:25 發表

早晨, 鈞哥！
我鍾意 DIY, 但片皮鴨同個翅真係正到 DIY唔好,
得閒約 d 弟兄姐妹上去食野傾計分享都好好

去你屋企DIY仲正呀add7icon , 未食LUNCH, 口水係咁流添
最後來一杯OT..add4icon

咁耐去過兩次咁多, 你地真係有口福

係佢裝修之前，我都去過幾次，又真係幾好食架。

原帖由 小寶 於 2008-8-11 13:06 發表


去你屋企DIY仲正呀add7icon , 未食LUNCH, 口水係咁流添
最後來一杯OT..add4icon

咁耐去過兩次咁多, 你地真係有口福

你自給自足有咁多收成夠係有口福啦！
嗰度冇0T叫, 真係要來我屋企 diy啦！

原帖由 花草之家 於 2008-8-11 13:08 發表
係佢裝修之前，我都去過幾次，又真係幾好食架。

點裝修都係咁古老簡樸, 粵語長片 feel, 個設計師好掂, 個老闆好有 taste.

原帖由 Agnes 於 2008-8-11 10:38 發表

我覺得冇變到, 只係生意更旺, 管理方式更 pro.
我十幾日前預訂, 接電話的叔叔多謝前, 多謝後. 當日上午可能驚我唔記得，confirm後又多謝前, 多謝後. 叻過好多酒店.
Freddy再去食吖, 你會見到從前的待應和部長, 樣子冇 ...

會嫁! 不過要約齊腳食飯要經過重重險阻排除萬難先得.
睇怕都要遲少少lu!
不過見你親身報導過, 咁對佢地D質數都有返信心!