本帖最後由 ingridhung 於 2014-2-5 22:34 編輯
今日上網睇到有師兄發帖,見到有想入手好嘅綠之鈴,於是一收工就直奔花墟,正值鵬X收舖中!
冇理班阿姐係度推貨架,一行入去就見到係薄雪萬年草旁,帶黃色疑似萬年草嘅小盆栽。佢比佢側邊嘅薄雪萬年草細,但又冇黃金萬年草咁黃,比我之前買嘅珍珠萬年草大,到底佢係因為唔夠光變黃定係另一品種?還要請教各師兄!因為我好鐘意萬年草類,所以問咗阿姐價錢就買咗啦(阿姐忙收舖,冇問名咯)
跟住再行入啲,不得了,係另一個好想買嘅品種,姬星美人!其實大家可能覺得上淘寶仲平,我之前試過,寄到落嚟香港已經咸菜,種落無論水多水少都慢慢枯死,所以見到咁健康嘅姬星美人,當然唔放過!
到呢個時候,阿姐已收剩一個貨架,我仲未揾到綠之鈴!原來收係舖嘅另一面!順帶一提,我一向習慣新買植物換泥,尤其是多肉,街買嘅多數用黑泥種,呢盆綠之鈴居然用二份珍珠岩,一份黑泥嘅介質種植,算係有心。
以上嘅我曾經諗過淘,不過遇過賣家唔肯寄萬年草,姬星美人變梅菜(唔關賣家事,始終姬星美人細粒又裸根寄出,損傷較大),能夠係花墟摸過睇過先買,雖然貴啲,但值得嘅,推動本地經濟嘛! |