請教做液體皂之可添加材料

請教做液體皂之可添加材--
之前做過何首烏洗頭水及蘆薈沐浴液，用的油都一樣：芥花油 150g ,橄欖油150g,椰子油100g,棕櫚油100g,加首烏水稀釋
洗感都幾好,多泡綿密，平時洗ㄧ次都ok, 打波後要洗兩次。最奇怪呢個配方做出嚟係膏狀的，所以當做蘆薈沐浴液時減少用棕櫚油至50g, 但做出嚟的效果都係軟軟的膏狀，不似我之前做過的好稀的液體皂，我諗應該係加咗棕櫚油的關係，不過膏狀都好，唔駛添加增稠劑！  
但重點係冲完涼洗頭後，洗的時候滑滑的,但ㄧ過水後，好似咩都洗走哂， 換句話說唔夠滋潤囉！請問可以添加咩材料可以加強番呢？謝謝賜教！
唔好意思，囉囉嗦嗦ㄧ大唯問題！

棕櫚油不會令沐浴液呈膏狀，只會令液體偏向不透明，但也要看比例．
個人覺得有棕櫚油混合椰子油的皂或鉀皂，潔力好又洗感滋潤，不像椰子油皂洗後很乾的感覺．

打鉀皂時，皂團內水份多少也會影響之後加水開溶的比例；還有油的牌子有無轉呢？　有時同一比例的油配方，但用了第二隻牌子的油，鉀皂出來的效果也會不同．

清潔用品本來的用途是用來清潔，只是潔力程度不同，及有多少未皂化的油留在身上，令清潔後有濕潤效果．
diy 梘液或我們常說的鉀皂，跟鈉皂不同之處是，鉀皂一般不應有未皂化的油留在皂內，特別是用在洗頭時，若有油份未皂化，洗完頭會有層油留在髮和皮膚上，會有種油膩感．所以我們打鉀皂，一定會算準鉀的比例，讓所有油都能皂化．

你打鉀皂係咪獨立每種油打一團鉀皂？　我平時是這樣打鉀皂，這樣可試到不同比例的配方，找出適合自己的配方．　有時間歡迎望望置頂的新手扎記，內有更多鉀皂資料的．

呢次係我第3次做液體皂了，初次做係照足糖亞的倒手香配方做，祇用椰子油及芥花油, 液體皂好稀，好好泡，不過，過完水有少少立，唔滋潤。至於以上那兩種配方,都係用同ㄧ款油（仲未用哂）用3倍鉀分量溶鉀，1倍油量的水溶皂糊的。
所以我做首烏洗頭水用咗310g的水溶103g的鉀，最後用500g水溶皂糊。另外蘆薈沐浴液我用橄欖油浸薰衣草來做，鉀

---

93g, 溶鉀水280g, 溶皂糊的蘆薈水用咗550g，最後呢兩個配方做出來都係膏狀，非液體，唔知錯係邊度？
做法我係跟糖亞的方法的—加熱所有的油脂,而鉀加水攪勻，隨即倒入油脂拌至麥芽糖狀，保溫1日後，我會隔水加熱攪拌,令皂糊加速熟成, 幾日後check PH 8度左右後, 就加水或添加物來稀釋就用！

係用鉀分量的3倍水溶鉀, 之前打錯咗，多謝提醒！

我冇獨立咁每種油嚟打的，主要係冇位可存放，每次打1L用完再打！
以上那兩個配方都幾好用，如果可以再增强滋潤感就最好囉！
唔知可以點改善呢？

我以為要放係雪櫃度添, 咁我再去爬吓文先! Thx~~ :>

Carmenchau 發表於 2013-4-22 23:29
呢次係我第3次做液體皂了，初次做係照足糖亞的倒手香配方做，祇用椰子油及芥花油, 液體皂好稀，好好泡，不 ...

我都係用開加熱法打鉀皂，一向也有read糖亞的鉀皂熱製法．
唔係好睇得明你寫的內容，希望我無解錯你意思．
以我加熱法的個人經驗，溶鉀的水量一向是４倍，因為加熱時會大量留失水份，使成皂後的皂團較乾和實，你用三倍水溶鉀其實算少水了(不知我有無看錯你文字意思）．

由於每次熱油打鉀皂trace 的時間不同，所以每次trace後，在鉀皂團餘下的水份都不同，基本上我未試過 皂團重量(不是只算油量）1 : 1 水 能好好開稀，通常1:1.5倍水，鉀皂還是稠稠的．尤其係芥花油和橄欖油這類需較多時間trace的油，我試過要３倍水才能好好開稀皂團．以你第二和第三次溶皂團的情形，橄欖油比重高的鉀皂團可能本來實在很少水份，就算550g 水也未能開稀皂團，所以呈膏狀了．　我也試過開100%橄欖油皂團，嘩.... 我用左３倍水呢～  

另外，想請問你有無用醋或檸檬酸洗髮過水? 香港的水質遠差於世界很多地區，不用酸水過頭髮，一般會有很多皂垢殘留在髮上，令頭髮不滑和多垢．台灣的水質比香港好很多，我去到台灣七天洗頭不用檸檬酸也沒事，但在香港和內地就不得了．

我也是個愛運動之人，一星期有七至十小時打波訓練，我的鉀皂或鈉皂配方可能你會有興趣一試，如果有機會，大家可以pm交換皂皂試用，再傾下心得啦．

仲有仲有，有無留意你用的鉀是幾多% purity?　有無做compensation?

我做的唔係熱制法，跟糖亞做的應該係冷制法，不過我唔想等太耐,先至係打好油後，保暖1日後，用邊爐煲煲熱d水，再放上那瓶皂糊，攪至受熱加速成熟，PH值降至8度就可以稀釋使用,唔駛等2星期！
我呢個方法溶鉀的水份應該唔會蒸發好多的！不過呢個唔糖亞的配方,而係我見網上post出嚟的，而我又想用緊d棕櫚油，減少椰子油分量，唔駛咁乾呀！
雖然係膏狀但PH值8度，我諗都唔怕用啦！用落覺得好用過第1次做倒手香果款（較乾,唔潤）
首烏洗頭膏我用咗都ok唔立唔乾，幾清爽, 頭髮冇打結（可能我係短頭髮，唔覺有皂垢) 所以我再用同ㄧ個配方做沐浴露! 我冇用護髮素ㄧ段時間，但都有諗過買檸檬酸自製潤髮絲，但係永興要買1kg我就嫌太多冇買囉！水母大師你有冇用過佢的檸檬酸，質素ok嗎?可耐放嗎？
其實我係咪應該用多於1倍的水來稀釋d皂糊至液體狀會好d呢？(如果再有此情況出現！）
非常感謝你詳細的解答！

Carmenchau 發表於 2013-4-23 23:46
我做的唔係熱制法，跟糖亞做的應該係冷制法，不過我唔想等太耐,先至係打好油後，保暖1日後，用邊爐煲煲熱d ...

你個方法好攪工喎, 為何要座熱攪鉀皂? 個人覺得無咁既必要, 而且座熱一樣會留失大量水份. 想鉀皂快Ｄ熟成，我平時攪鉀皂是直接加熱, 只要keep 在80-90度, 打個椰子油皂不用 10min KO, 橄欖油皂就要成粒鐘, 但第二天用得. 我的方法全部用手攪, NOT 用電攪, 哈哈~ 簡單工具又快趣~

有時間可以看看我鉀皂熱製法個帖, 個底鉀皂用左 1: 2倍水開稀, 當時想試增調劑, 所以加多少少水稀釋皂團, 100% 橄欖油對我來說實在太潤, 後來加了20%椰子油和棕櫚油，也是1:2倍水，潔力就好很多了，泡泡也綿．

鉀皂不同鈉皂，一般不用複雜配方就能提供合心的洗感和效果，當你試過最簡單的配方（如25%椰子油，15%蓖麻油，60%橄欖油），再比較下之前的複雜配方時，就會漸漸唔攪咁多複雜野～　哈哈～　

不過呢，溝稀皂團的水若用了不同的水，的確有不同效果，我之前用菊花散煮水溝稀皂團，用來洗頭髮，洗完出來的頭髮比較油亮，也不會有多餘頭油，感覺很好呢～　有時間等我post 條方俾大家試下啦～　

另外，洗感爽唔爽有時要看天氣季節和當時自己身體狀況，你下次可以試下同一條方溝不同的水，看看造出來的效果係咪一樣．

你咁有實驗精神，好應該試下獨立油種造一個皂團，再用不同比例混合做皂液．我的皂團都係放在廚房櫃裡的暗角，用上半年也不覺有問題，也聽過有花友執屋時找到２年的皂團，開水出來洗澡，一樣好用．

不要叫我水母大師啦, 呢度有好多diy 資深花友, 個個都係大師, 水母就是水母, 大家分享心得啫~

檸檬酸是一些很低成本的東西，可用在食材和清潔上，很多飲品都有入檸檬酸，包括 c c 檸檬．

我用的檸檬酸是跟 牛頭角diy 姐姐買，很便宜．　不清楚其他地方有乜唔同了～　我淨係知永興貴D囉．

你是短頭髮，反應可能有別呀，我們也有花友洗頭不用酸水潤絲．每人髮質各異，但我自己如果無用酸性物質過水，吹乾頭髮後梳頭時會很易有污垢留在梳子上．這是我個人經驗．


講番補足鉀量的問題，鈉皂可以不補足，因為油份就算沒有皂化，在鈉皂裡也固體化了，與鈉和甘油融為一體，洗出來不會感到油油的．
但鉀皂不補足的話，油在皂團裡仍是液體狀態，就會有洗不乾淨的問題，嚴重的話，沖完涼個浴缸都會有油．聽過有朋友無補足鉀量，可能佢的鉀不足95%純度，最慘佢用來做家事鉀皂，這家事皂洗出來的碗有層油，過幾次水都唔乾淨，梗係啦，皂團有5%油份，不停洗不停加番Ｄ油在碗上，當然洗不乾淨啦，最後她要掉了個皂團．

網上有些 soap calculator 有提供補足鉀皂的，如helen's 個計數機：
http://www.soap-diy.com/Soap_Calculators.php

jellyfishy 發表於 2013-4-24 09:30
你個方法好攪工喎, 為何要座熱攪鉀皂? 個人覺得無咁既必要, 而且座熱一樣會留失大量水份. 想鉀皂快Ｄ熟成 ...

哈哈! 我就係見你果個熱制法好刺激, 所以先用糖亞個minor的方法去加速熟成咋! 同埋第一次我做倒手香皂液的時候, 人手攪咗1個半小時, 攪到膊頭痛到宜家 ! (有舊患呀!) 唯有買番部電動攪拌棒, 之後2次攪12-20分鐘就掂擋了! 所以呢個熱制法我就唔會試囉, 因為要人手做 , 唔想加重手同膊頭的負荷! 而熱制法如機的話, 我驚有危險喎!

期待你的菊花散洗頭水配方呀! 我宜家用緊的首烏洗水總覺得頭髮不夠油亮! 而檸檬酸我會試下用, 睇下可唔可以令到頭髮髮質有所改善, 我的頭髮一直以來都唔多直, 好幼易斷, 幾鬆散下架, 留長髮最好做負離子電直佢, 否則剪短算了!! 頭髮有些乾又唔油亮! 唔知搽下髮尾油有冇用?

蓖麻油唔知係邊度買會便宜些呢? 去過Linda度, 好貴; 永興又唔見有得買! 而菊花散又係邊度有得買呢? 聽起來好似國貨果D沖劑咁! 哈哈!!!

你俾果個計算用的web-site好有用, 之前冇耐性去睇, 宜家再睇覺得好啱用, 好詳細, 簡單易用, 謝謝水母!