園藝新丁種迷你黃玫瑰

小弟最近喺花街買左盆迷你黃玫瑰
1.想問下需唔需要換盆，定係就咁繼續喺原本個盆種?
2.係唔係當花開始謝就要剪左朵花對落2節?
3.盆花有係正確名稱?
謝謝各位解答

1. 都幾迫下...開完花, 換盆會好D, 主要係加返d 基肥, 等下次開花靚d

2. 唔一定。總之係搵到健康既芽點對上剪。


3. 迷你月季-黃金金幣

簡介        樹勢強健，耐熱多花
品種性狀        花徑(公分)：3~5
瓣數：40~55
株高(公分)：50~120公分
刺：中等
香氣：微香

唔該晒，今日喺圖書館都搵左剪枝相關嘅書

點解新枝生出黎淺色咗咁嘅?
上網睇月季剪枝，花後剪通常唔要花下2組3葉，有啲就話剪淨3個節，又有啲話夏季唔好重剪，咁其實好似有啲矛盾，有無高人教下小弟。

新葉係青綠無問題喎。
每家各自有自己種法心得，你依家剪完有新葉出就無問題，
唔需要太擔心，記住生長期施下追肥。

哦，謝謝

迷你品種好易養, 只要你比足肥料, 4季都可以不斷開花

我個人對種植迷你月季意見:

1. 夏天盡量唔會比佢開花,一見有花蕾就摘。重點促進生分枝條
   (將養份留比枝幹同葉,為入秋可以開靚花而準備)
   不過就算你成日摘,夏天都會係咁生花蕾,如果你想觀花就由佢生,不過記得開完花要比返D肥

春天.夏天既迷玫....對比圖

春天


大到已經唔可以叫迷你

夏天

夏天雨季的花,特別樣衰==


點解我唔比佢夏天開?!
因為覺得好哂肥料, 會將D養份都供去生花蕾,開D 唔好既花
如果你及時摘蕾, 養份就會去返枝幹, 先會越來越多分枝, 粗枝~


2. 基肥換盆時落好(我大概1年就換一次盆)
    每3日淋一次薄氮肥水,一個月用一次有機肥水

3. 一日淋一次水,早上淋到盆出水為止
    夏天天氣太熱, 晚上我會再噴水係葉上
    其實呢日落大雨,可以儲定D雨水, 因為雨水好好營養,有氮&多種微量元素
    我試過用雨水淋左一牌, 泥土竟然生左蚯蚓,我就拎黎養肥~

4. 夏天,冬天強剪 >養新粗主枝條
   春,秋弱剪> 開花期,所以不用修剪太多

月季喜歡肥沃泥土&疏水好既泥, 每日4小時以上既陽光,
只要你滿足呢3點.全年都會開靚花比你
唔好一直用化學肥, 偶爾都要用有機肥料,
我親身對比過, 用左有機肥, 開既花會比用化肥大好多


仲有, 一般迷你玫瑰壽命都有幾年
主幹慢慢就會木質化,不會再生健康粗大既枝條

你想幫佢延續下一付代, 就要學識得扦插
最好就係開完花, 留3個健康芽點, 剪出黎剪埋頂上既花, 之後試下插係無養份既介質
KEEP住比佢一個高濕環境, 等幾個月佢出根穩定,就有一盆全新既玫瑰

PS# 春天,秋天扦插成功機會最大!

熟能生巧, 我都係慢慢練, 就係咁, 我由一盆, 變到而家有4盆


扦插成功, 唔好學我, 呢個我只係留左一個芽點 ==

3個月後的初花

sheungx2 發表於 2015-6-23 17:04
迷你品種好易養, 只要你比足肥料, 4季都可以不斷開花

我個人對種植迷你月季意見:

多謝詳細指導,我係剛買返黎換盆落左黑雞肥做基肥,唔知係唔係換盤未適應未生過新花蕾淨係不斷生枝.
淋水就見到表面啲泥乾就會淋透,不過最近落雨啲泥都成4日都未乾
我試緊撞墻2.0插桿法,插左3枝桿.

wing1029 發表於 2015-6-23 19:44
多謝詳細指導,我係剛買返黎換盆落左黑雞肥做基肥,唔知係唔係換盤未適應未生過新花蕾淨係不斷生枝.
淋水就 ...

正常
因為你剪得太多, 所以而家主要都係生返D 枝幹,夠一定高度才會生花蕾

每個時期都要比唔同既薄化肥

你盆花 d 枝條太幼啦.....太幼既條, 往上生出來既枝條只會更幼更弱
就算打後有花蕾都會好細, 開得唔好

你而家重點,唔好比佢開花,有花蕾,摘左佢!
用20-20-20既生長型化肥, 養粗主枝幹, 枝條健康粗壯, 日後大把靚花等住你開, 唔好心急一時
底下既枝條夠粗夠健康, 往上生既都會係強壯多芽點既枝幹!



市面上有買唔同號碼既花卉專用化肥, 有3個號碼
例如 15-30-15 = 氮-磷-鉀


氮肥(俗稱葉肥)：主要的功能在長葉子及製造葉綠素，以供光合作用產生碳水化合物，因此可增進作物的產量。凡是在長葉子的生長期和以葉部為食用(如蔬菜)或觀賞(如草皮，觀葉植物)為主的作物，需適時且多量的氮肥供應。

磷肥(俗稱花肥及果肥)：主要的功能在能量的製造和運移，對開花及結果影響很大。舉凡在開花時期或以觀花為主的花卉，則需足量的磷肥供應。

鉀肥(俗稱果肥及莖幹肥)：主要的功能為維持細胞內電解質平衡與細胞膨壓，且為蛋白質合成及五十多種酵素催化作用所必需。舉凡在結果的時期以及以果實收成為主的作物均需足量的鉀肥供應，且鉀具有使莖幹強健，增進作物抗病、抗蟲及抗環境逆境(如霜害、旱害、風害……等)之功效。

===============================

好多人覺得種玫瑰唔易, 因為月季唔易打理,大多品種都好易病,多蟲害,(要成日打藥.施不同肥)
無良好種植環境同技術, 佢即刻死比你睇 ....

新手由0開始學起, 係會覺得好麻煩好多野記~
(因為我剛開始都係咁, 因為唔識而養死過一盆 )

不過我個人覺得啦
只要你真係比心機去學種, 一旦學會各種技巧, 再實地買黎學下種
慢慢....任何玫瑰都能輕易種出來^^

sheungx2 發表於 2015-6-24 01:44
正常
因為你剪得太多, 所以而家主要都係生返D 枝幹,夠一定高度才會生花蕾

咁即係我盆花現在係缺鉀,等我努力養粗佢先,THX

請問我哩盆玫瑰是否太瘦弱？7月頭買至而家開過2-3次花，但花明顯比初買回來的細朵

bigon99 發表於 2015-9-7 18:27
請問我哩盆玫瑰是否太瘦弱？7月頭買至而家開過2-3次花，但花明顯比初買回來的細朵 ...

開花後, 你一定要比返d 肥料, 先夠養份比佢孕育新枝&健康既花蕾

每一星期比一次薄肥料 (最好有機肥, 無既化學肥eg 花寶都ok)

想花開得大, 要有足夠陽光照射, 最少都要4小時....全日照最好

我所有花都係用哩隻肥料，夠唔夠？對於肥料不太了解

請問用"花生麩"施肥 可以嗎? 謝謝!

==============

可以啊, 只要係有機肥, 玫瑰都愛

bigon99 發表於 2015-9-8 07:35
我所有花都係用哩隻肥料，夠唔夠？對於肥料不太了解

包裝只係說通用, 我看不清佢究竟係咩有機肥
玫瑰花係喜歡高磷既肥料, 因為有助佢開花

你只係得呢包, 都唔係話唔得~
咁你就要好努力咁個個月追下肥~


怎麼說....有機肥大多係用作基肥, 有些有機肥有味道,用作追肥會有異味~
我試過用餅肥作為追肥用, 臭到受不了




最簡單, 我地種開月季, 都喜歡下一種叫奧綠緩釋肥
一粒粒的, 會慢慢係泥中釋放薄薄的肥, 供花兒最基本既需要


另外...就係化學肥料, 例如花寶/花多多呢d 一包包藍色既粉
因為無味道, 使用方便, 水溶性, 種玫瑰花都必備
玫瑰花在不同時期, 需要用不同肥。
例如小苗, 就要用生長型 ; 想佢開花, 就要用高磷肥, 開完花, 又要用全效肥
呢D, 用化學肥去控制會方便好多
我喜歡每一星期就會淋一次薄既化學肥

每個月再用有機肥追肥

追肥: 翻開表面泥土, 將固態肥料埋下去, 再用泥蓋好
化學肥: 真係少少好,你要對返個比例, 1L水:一匙  當平時淋水就得

有機肥有好多種類
(花墟有)早古肥都不錯, 喜歡它無味,一粒粒方便
(花墟有)黑雞肥都ok, 比起其他肥~算是很輕微的味道

其他...
餅肥: 肥效好好,但味道強烈,只能作基肥
骨粉: 無味粉末, 基肥追肥都得, 高磷, 促花蕾用
各動物糞肥: 如果係發酵好的,應該沒什麼味道,可以當基肥/追肥用
廚餘: 自己整肥水, 都不錯, 但味道不太好聞, 室外種既就可以試下
        (咖啡渣、豆渣、剩下的蔬果等等, 只要經過幾個月既發酵就可以用了)

我有試過落咖啡渣在盆邊，又好似快咗開花

sheungx2 發表於 2015-9-9 17:07
包裝只係說通用, 我看不清佢究竟係咩有機肥
玫瑰花係喜歡高磷既肥料, 因為有助佢開花

有很多資訊啊

請問點解玫瑰葉有白點？係咪有病？應該點做？

紅蜘蛛，葉下有許多極小的蜘蛛，現在天氣乾燥極易有紅蜘蛛危害~用水沖洗葉底，洗淨，有一定效果，因為紅蜘蛛怕水~我苗特別多，有紅蜘蛛時用的愛卡螨與金滿枝這兩種殺虫藥，效果特別好，不過市面不一定有——都是網上買來。你只一棵小苗人手滅害好啦~

（可在網上查詢紅蜘蛛的介紹與其他殺虫方法，我比較懶，只會簡單介紹）

不是白化病？不過我已將有白色點的葉剪掉及整盆浸水