小孩眼 1

怪力亂神...
有無遇見一D難以置信o既野, 聽過一D不可思議o既事呢!?

有一次屋企人預早去拜山,
地點係將軍澳墳場.
隨行o既有妹妹一家, 仲有三歲o既小外甥同行...
我果日要返工, 所以無去到.
放工返到屋企, 大部分家人已經瞓晒,
不過呀媽就過左黎我果面屋處理剩餘o既家務.
其間, 佢走出廚房同我講:
你知唔知你外甥仔今日拜山可能見到野!
下! 你點知呀!?
你外甥講家嘛!
今日果處無乜人咩!?
無呀!
下! 佢去到比野嚇親喊呀!?
唔係... 佢去到不知幾開心呀! 周圍走!
不過... 佢o岩o岩臨瞓前同佢呀媽講!
講咩呀!?
佢話... 去到果處有個人同我**"咁"呀! 佢好驚驚呀!
(**我媽不斷勾起食指做出平時叫人過o黎o既動作.)
佢話*杯茶响上面飛下飛下咁呀!
(*每次拜山都會奶茶行街去拜呀爺.)
下! 咁佢瞓左未呀!?
瞓左啦! 佢呀媽"TUM"左佢幾耐先瞓呀!
佢一味拍拍心口話佢好驚驚呀!...
怪唔知佢一去到就擒擒青走左去一邊都唔知做乜啦!
我話: 多數細路都會見到果D野嫁...
天日佢可能會發燒啦咁!
不過, 最後都無事...
因為我地細個遇到o黎D事之後都會發燒...
不過果D又係另一個故事......
果晚我不斷諗, 果個會唔會係呀爺呢? 又或者......

<完>

我嗰單仲恐怖…
我囡嗰時2歲幾, 在星期六下晝, 佢指住屋企大門問我︰佢係邊個？嗰刻我即刻答佢︰乜都冇, 過嚟媽咪度.
其實我個心已經跳得好勁… 知道有唔妥… 諗住「佢」路過咁啱睇到啫…
點知嗰排我囡日日夜夜都要黐住人, 有幾晚要我地陪瞓, 仲問我後面嗰個係邊個嚟…
直到有一日我返緊工, 工人姐姐打嚟喊晒口, 話我囡大喊, 話窗外有個人飛緊入嚟, 好驚好驚, 工人話屋入面無啦啦有陣風, 所以佢都好驚…

waiting 發表於 2021-1-13 17:10
我嗰單仲恐怖…
我囡嗰時2歲幾, 在星期六下晝, 佢指住屋企大門問我︰佢係邊個？嗰刻我即刻答佢︰乜都冇, 過 ...

同我下一個故事差唔多喎！
响哩個時候呢！
我呀媽就會拜下咩床頭呀婆叫佢睇住d細路仔，
之後就無事lu!

freddywongdy 發表於 2021-1-13 17:31
同我下一個故事差唔多喎！
响哩個時候呢！
我呀媽就會拜下咩床頭呀婆叫佢睇住d細路仔，

我係即刻打畀亞媽, 佢即刻去揾相熟的衣紙舖, 跟住第二日就幫我囡燒衣紙, 搞掂咗. 如果搞唔掂, 就要揾師傅㗎喇.
講開又神奇, 我媽燒完衣冇同我講, 之後我問佢係咪6點左右燒, 佢問我點知㗎, 我話睇到個囡面色唔同咗, 紅潤番晒, 仲肯行開自己去玩.
好彩係越大越少睇到.

waiting 發表於 2021-1-13 17:43
我係即刻打畀亞媽, 佢即刻去揾相熟的衣紙舖, 跟住第二日就幫我囡燒衣紙, 搞掂咗. 如果搞唔掂, 就要揾師傅 ...

好多細路仔都會咁！
我個妹細個果時成日都失驚無神指東指西話有野！
嚇死寶寶！