新寵：葵扇尾短鰭鬥魚 (& 新增 new friend)

呢位小朋友身長連尾約２吋（我估佢未成年......），平常光線底下顏色似黑色，



強光下就顯出深咖啡類似鐵銹色嘅本色＆豹紋帶紅斑嘅鰭。行動敏捷似支箭，所以命名為「Espresso」。



Espresso 佢最大嗜好當然係「吃」，但奈何經常眼闊肚窄，吃得多好易便秘！
其次就係鍾意「照鏡」--- 其實係想搵對手打交，見到鏡內嘅自己以為係另一條魚......
得閒又喜歡「追」水泡，多過吹水泡。追到嘅水泡就會當佢係獵物咁篤爆！

哇~好型喎
D水草仲咁綠添,定係咩黎架?

回復 2# billy72875
唔係水草來架，而係生咗根嘅富貴竹嫩葉。
試過插水草但啲葉好易甩，整到個缸四圍到係碎，
仲難清過魚屎（魚屎最多都係一日一小篤咋！）。

鬥魚原生地係水稻田，咁富貴竹嘅嫩枝/葉又有啲似水稻，
葉身大而柔軟唔會割親啲魚鰭咁我就當係水草咁插，
魚仔都好喜歡喺啲葉間捐窿捐罅同匿埋訓覺。
最重要係唔駛花錢買，呢啲嫩葉係剪自我啲種咗好多年嘅富貴竹。

add10icon真細心

加幾張相：

開餐前嘅慣性動作
全身垂直兩眼朝天！必要時仲會向住目標旋轉 。



與小電筒對恃
最近佢唔知做乜當支個電筒係「敵魚」，
都冇開著就開始 flare up，有時突然間拎支電筒埋缸邊，
佢仲會驚到即閃！


唔知係咪電筒正面有啲似佢同類嘅關係。
作為一條魚佢嘅聯想力都幾豐富吓......

剛剛新帶返來嘅新朋友，呢條係皇冠尾鬥魚女，身長只得1.25 吋（一般女都係細條過仔）。

佢啲顏色更加模菱兩可，室內日光下見到主要係藍色有啲偏紫......
   


但閃光燈下，藍色嘅就變成湖水綠！本來胸鰭上嘅少少紅色都唔見埋！
   

Espresso 把戲之：入圈等開飯！

最近喺youtube見到有條識玩幾種「把戲」嘅金魚，原來魚仔都可以訓練！
咁我又無無聊聊地試吓整個簡單動作睇吓我條鬥魚仔有幾受教。
圖中係一個用完嘅magic tape中間嗰個膠圈，加上吸盤固定喺魚缸邊上，
圈圈離水面嘅位置剛夠條魚游過。啱啱放上去時條魚都幾好奇，
都會由上到下或下到上穿過個圈探吓呢舊乜東東（最緊要係食唔食得！）
但呢啲動作佢好快就唔再做，可能佢發現唔到有乜著數（冇嘢食）......
為咗令佢養成慣性，於是一連幾日開始「引導」佢成功穿過個圈至餵一次糧，
經過一輪「訓練」後，而家佢好似知道要食嘢就要「入圈」，
唔駛畀指令（輕敲缸邊）都曉得自動自覺入圈（套）等餵，哈哈！

叻叻呀魚仔

兩日前，養咗有９個月嘅Expresso因急病藥石無靈而逝世！
死因似乎係體內受細菌感染（魚肚位置隱約見血斑）或腹水。
死前一日身體開始變淺色兼呼吸有困難又冇乜力游上水面，
放咗入個淺水細盒仔等佢唔駛郁就吸到空氣，唉佢捱咗一晚後終於捱唔住，
第二日正午就歸天，但出奇地死後顏色變返正常。

回復 corina 的帖子

水質問題又唔似，因為條魚女都係用同一樣嘅水＆個兜細好多但反而健康得多。
魚仔一直都好容易甩魚潺同便秘，有時要用個電筒仔嚇吓佢至曉得便便，
我諗條魚本身有啲暗病，可能漚漚吓漚到家陣就頂唔住病發。

不知不覺間條藍綠色魚女大條咗，由原本嘅１吋零嘅魚毛到而家差唔多２吋長。
橫掂吉咗個大缸，消過毒後就同魚女搬屋喇！第二日佢就適應晒，連嗰個白色圈圈，
唔駛教都識得捐上捐落，好似玩得幾happy吓。等陣再貼相。

回復 緲緲 的帖子

養魚真係好開心,以前睇過話金魚會掛住主人,請問你d魚會唔會認得你?

養咗有９患急病死咗,真係會好唔捨得,傷心過後睇下咩原因而引致細菌感染,再養過!

回復 corina 的帖子

我啲魚會認得餵佢地食魚糧嗰樣嘢囉！手指呀、筷子之類，一見到就非常之興奮。
同埋我發現佢地嘅視力超勁，離遠同佢地揮手時（距離超過一個人伸開兩手臂咁遠），
假如中間冇嘢檔住佢地視線嘅話，佢地見到後會游到缸邊好興奮咁搖頭擺尾！
諗起死咗嗰條魚仔，如果你用魚糧引佢但又唔餵時（即係玩佢），
佢就會做出一種類似發猛憎嘅動作加上個口會開合得好大同急，好似要鬧人咁......

好得意,魚真係好有性.
我有朋友以前養錦鯉,每次喂魚前會唱歌,久而久之,d錦鯉一聽到歌聲會好開心係池內打轉游,有時仲會跳起......可惜我有三隻頑皮貓,唔係都想養金魚!

corina 發表於 2011-3-10 19:13
好得意,魚真係好有性.
我有朋友以前養錦鯉,每次喂魚前會唱歌,久而久之,d錦鯉一聽到歌聲會好開心係池內打 ...

可能係鬥魚比較醒目掛，呢種謎鰓類嘅魚進化到可以用鼻孔喺水面直接呼吸空氣喎，差在未變成兩棲咋。

補返幾張魚女搬竇後嘅相。鬥魚充滿好奇心，起碼我養嘅都好喜歡捐窿捐罅，
呢個白圈圈可謂滿足到佢地嘅呢樣嗜好！