焗鮮杏批

顯示全部樓層

有日放學要走去花墟買野, 途經一間果菜舖,
o黎間舖頭以前响深水埗返工果陣, 食完晏間唔中都會走去睇下,
因為間舖賣o既果菜有時幾特別, 超市賣得貴o既野响o黎處買會平好多!
今次經過, 竟然比我見到有新鮮o既杏賣.
老細話係响廣西黎, 出面唔係好多地方會賣, 因為好易爛!
我見佢一大盒不過剩返小小, 每個杏都有發泡膠網包住,
keep 得 ok 喎! 買左磅半......
放左入菜格一個禮拜, 今日攞返出黎仲好新鮮飽滿,
就整左個焗原粒鮮杏啦!

甜餅皮材料 (成團約780g) :
牛油    200 g
糖粉    100 g
蛋          1 ea
底筋粉 420 g
奶粉    1 湯匙

甜餅皮做法:
牛油切粒室溫軟化, 加入糖粉拌勻, 再加蛋攪拌到光滑,
倒入底筋粉及奶粉攪勻, 輕壓成扁圓,
分約 450g 同 330g 一舊包好保鮮紙放入冰箱雪硬備用.

杏批材料:
鮮杏    5 粒
杏仁粒約一湯匙
甜餅皮約 350 g

做法:
將甜餅皮份開約 330g 及 220g, 枱及木掍撒上麵粉,
粉團輕搓圓按平碌成約 1cm 厚圓片.
焗盆墊上牛油紙, 舖上 330g 餅皮, 放入原粒杏, 撤入 2/3 湯匙杏仁粒.
再將 220g 餅皮蓋上輕按實包好, 中間開一個細窿疏氣用.
表面掃上蛋漿, 撒上餘下杏仁粒.
放入180度 15min 預熱爐, 180度焗 1個鐘.
表面金黃就可以出爐.
放上涼架放涼.
放涼後撤上厚糖粉.
完成
點解要厚糖粉?
因為杏本身唔甜, 略酸!
餅皮杏粒o既甜美香脆加上杏o既酸香微苦,
好開胃o既一個甜品.