第一同第二件喺我仲係o靚妹既時候發生,
第一件:我以前住牛頭角花園大廈,嗰度啲樓大約一楝十層,四楝由一個天台連埋一齊,天台上面打撗掛滿晒繩,係啲人用嚟掛衫既.嗰陣時我同啲朋友上天台玩,突然有一陣好大既風吹嚟,跟住我就聽到其中一個朋友大叫同喊,原來啲繩吹起,佢條頸俾條繩吊起咗,點解我會話吊起,因為佢雙腳已經有少少離地.跟住我地好驚,有朋友企圖拎開條繩,但唔成功,跟住我地其中一個朋友住天台下面一層,咁佢就即刻走番屋企叫大人,之後啲大人嚟到,講咗句唔知乜嘢,條繩就自己放開咗,後來成個幾月我先再見到俾繩吊起個女仔,佢條頸上面仲好清楚咁見到條繩痕.
第二件:同樣喺我上面住既地方,我住一樓,地下嗰度仲有住人既單位,我有其中三個朋友(佢地係姐妹)住喺其中一個單位,佢地個嫲嫲死咗,跟住佢地自己屋企人已經成日話見到嫲嫲喺佢地屋企門口叫佢地,之後有一日,我喺廚房洗碗(嗰度對住樓下大堂),我見到佢地嫲嫲,仲同我講,叫你呀媽唔好同XXX打麻雀(XXX係我啲FD呀媽,佢生前已經唔鐘意佢新抱成日打麻雀),嚇到我打爛晒啲碗.
第三件:有日下午,我見到一個好耐無見既女性朋友,佢同我傾計,本來件事好平常,離奇既係,兩日後,我有朋友同我講,知唔知XX死咗?!我話吓?幾時既事?點解會咁?跟住個朋友同我講,乜你唔知咩?報紙都有講,佢今日頭七,喺因為錢,俾佢男朋友殺死,跟住我隻眼都大埋,頭七???!!!我前兩日先喺街見過佢,仲同佢傾計!!我仲話個朋友同我講笑,跟住返屋企搵一個星期前報紙睇...結果,個朋友無呃我.咁我姐係日光日白見到..... |