迷迭香求救

剛從花墟買回家一星期
最近兩天突然變軟
放向西窗邊
兩三天淋一次少量水
潑開泥土見到根不多，但色白。

另外泥土裡面不少墨綠色大大小小的顆粒(約2mm直徑)
破開有液體
是蟲蛋還是肥料？好可怕啊。

室內種? 好難種好的

種東邊比較好,西邊太陽熱,淋過水又被下午太陽曬住d根等於一直焗住。

迷迭香怕濕焗,香港氣候比較唔好種,淋水方法最好見乾見濕,等到泥乾先淋水,一淋就要確定有淋透水,因苗場用既植料好易乾透後變得好難吸水,如果可以的話之後換泥時溝入多少少河沙比較唔會有爛根或者淋唔透水。

我個人見乾見濕既方法係:
乾,唔止係盆面既泥摸落乾,拎起個盆如果個底碟仍然有明顯水氣我就唔會淋水,如果底碟乾爽,但由底洞伸手指摸泥仍有足夠水氣可以濕潤手指我都唔會淋水,直到泥變成摸落略帶濕潤但已經已經不足以幫你皮膚補水既時候就係最o岩淋水既時候啦。

濕,因為上面講既植料問題我個人多數會用少量多次既方法淋,多用幾分鐘,每次淋少少水確定泥有吸入去再繼續淋,如果直接一下淋大量既水通常既結果係: 面層泥土濕,中間仍然乾,水都從2側流走晒，正常吸飽水既盆拎起黎重成倍都好正常,又或者更懶既方法係裝盆水,將花盆放落去等佢自己吸水。

至於蟲既問題,入面既多數係肥料,但如果你擔心的話google一下關鍵字眼應該好多結果

powergun 發表於 2017-6-18 12:12
室內種? 好難種好的

我想種室外架，但我見呢幾日天氣唔好，放露台佢應該會濕透怕爛根(上盤就係咁死左)，佢又bb諗住室內放穩定先放佢出去。

morning 發表於 2017-6-18 13:33
種東邊比較好,西邊太陽熱,淋過水又被下午太陽曬住d根等於一直焗住。

迷迭香怕濕焗,香港氣候比較唔好種,淋 ...

咁我而家好唔好淋到佢透直接放出東邊露台？
呢幾日落雨我怕攪死佢

felicialau 發表於 2017-6-18 15:23
咁我而家好唔好淋到佢透直接放出東邊露台？
呢幾日落雨我怕攪死佢

你可以用魚蛋竹籤/木筷子插到泥膽中間深度既位一陣,抽出黎之後摸下有冇水份夠唔夠濕潤,如果摸落好爽身代表中間既泥根本冇吸到水,咁就要淋透水放窗台通風但雨淋唔到的地方。

雖則我話見乾見濕,但實際上d泥可能只乾左70%泥膽中心位置仍然偏濕潤的，太乾先淋水亦對根唔好,因為根毛都乾死,重新淋水後易爛根。

迷迭香可以曬太陽自然生得更好更香,但夏天當落過雨或者剛淋過水可以暫時避開酷熱太陽對根比較輕鬆。

felicialau 發表於 2017-6-18 15:23
咁我而家好唔好淋到佢透直接放出東邊露台？
呢幾日落雨我怕攪死佢

你怕又焗壞d根的話可以用瓦盆陶盆種,2種盆都無上釉,透氣透水非常好,夏天泥既溫度亦冇咁高,但泥非常快乾不適用見乾見濕淋水法(到"乾"時已經乾過頭),而且盆身易霉。

一係簡單方法,係底碟放幾粒石春墊高花盆,平時一見積水就倒左佢，盆底常有積水對植物唔係太好。

我成日都搞唔明迷迭香，明明種種下好地地，仲生左好多新枝，但佢經常都...
從前... 有顆迷迭香，有一日.... 佢突然間死左....

吹脹...

所以都好期望有師兄/姐可以開個有關迷迭香既POST，可以教大家點KEEP住佢健康

我屋企有種2棵,種係發泡膠箱入面,一棵暴曬一棵半日照,基本上只要定時淋水就得並無做過任何施肥動作,佢亦唔太生蟲。

我諗除左陽光不足種唔到外其他主要係根既問題,我種佢地係大既發泡膠箱入面,因為泥多所以其實相對泥既溫度變化會影響比較少,而且用既泥疏水透氣保濕各方面都非常好,所以我淋多左水淋少左其實影響都不大...即係其實我隨便種就得....除左種植初期根系未伸展開時要多照顧。

我覺得種迷迭香既關鍵係植料要夠疏水透氣,有條件的話用大盆種絕對比細盆好,然後就係淋水方式,迷迭香呢類木質香草生得慢,一旦爛根好難可以恢復過來,所以盡可能要保持根系强健,用大盆種可以令根部處於相對安穩既狀態。

morning 發表於 2017-6-18 20:08
我屋企有種2棵,種係發泡膠箱入面,一棵暴曬一棵半日照,基本上只要定時淋水就得並無做過任何施肥動作,佢亦唔 ...

請問咁即係用沙加泥比較合佢地? 謝謝

ic3b34r 發表於 2017-6-19 11:25
請問咁即係用沙加泥比較合佢地? 謝謝

植料本身透氣好的話唔洗,如果唔係河砂係一種唔錯既改良介質

morning 發表於 2017-6-21 19:54
植料本身透氣好的話唔洗,如果唔係河砂係一種唔錯既改良介質

收到，謝謝