日誌
我踩！
熱度 23 |
今日閒極無聊，想起大半年前朋友送贈既單車咪表尚未安裝使用，
於是用過早餐，取出工具，匆匆安裝。
原來說明書有五國文字，獨欠中文，(大國崛起？)
唯有看圖識字，亂撞可也。不消一會兒完成調教，
接下來便是實戰測試，執齊頭盔、風鏡、露指手套、前後燈、飲用水，出發！
一路金風輕送爽，
兩旁玉樹伴飛翔。
如是者一路慢轆兩點幾到達河上鄉，由雙魚河進入，那八蚊任食既豆花廠就在眼前。
嘩嘩嘩！不得了，聽那人聲鼎沸，看那萬頭攢動，排隊排出店外轉左個彎，
真是人比店內的蒼蠅還多(蒼蠅本來就多)！
算吧，都係飲自攜清水啦，等回程黃昏臨收舖再黎！
繼續上路，經上水、粉嶺，諗住去大埔開餐，最後去左圍頭村尾勝記士多食左個村姑餐蛋麵、
加樽裝大可樂，盛惠二十一個大洋。唔錯唔錯，有鄉村風味。
時候不早，別過村姑，打道回府。
接近五點又回到豆花廠，今次無咁多人喇，放下八蚊，買個匙羹，
先企住食兩碗豆花，再坐下又兩碗，臨走一碗凍豆漿，4+1，
比上次夏天時5+1少左，算啦，都飽到食唔落。
0係豆花廠都磨左成個鐘，跟住開頭尾燈由青山公路、新潭路回程。
最後睇下個咪表：踩車時間5:20，
踩左83.66公里。
發表評論 評論 (66 個評論)
- 回復 chunyiumun
- 好爽呀~
一條友踩踩踩......我唔期望一個人踩,但好期待呢d好消遙自在ge日子......等等等......
- 回復 PhyllisTang
- 唔知幾時才起好海岸單車線
- 回復 cookie20002005
- 清補涼: 踩有扶助轆戈d未得lu ...... ^^唔好玩啦
