之前响不同帖都提講呢樣野,今年潮濕天氣又快到,又係時候找料防霉~
今次集中d開個帖講心得.希望大家啱用,有乜好做法,也請講講啦.
霉呢家野呢.... 有排講我既心得, 呵呵~~~
水母住山邊(樹林和水溪,好大濕氣), 早幾年牆灰水夠期, 發霉發到全屋黑晒, 連天花都黑, 但有個大魚缸, 唔可以重掃灰水, 抹到我喊~ 抹完第二年又黑過... 試左幾年, 終於搵到個好方法.
抹就一定要抺, 我抺牆就咁用清水加少少檸檬尤加利精油+lavender (趕蚊趕菌), 記得戴口罩.
!! 預防番發(霉):
請買個溫度連濕度計, check 住家中濕度溫度, 霉菌在24度以上, 濕度85左右發癲成長 (好似根粉介,討厭!!)! 所以家中一去到呢d溫度濕度, 就要關窗, 開抽濕機, 或開除濕冷氣(預較2小時後關掉), 一定要開風扇 (轉動, 記得預較時間制), 風扇係最重要! 有風的話, 霉菌無法在牆面停留, 無法生根!! 有陽光就好d, 唔洗關窗, 但要保持空氣流通.
端午前後最易黑牆, 請引用古人做法, 燒艾草 (真係好work~ 可有效防病菌, 趕蚊蚤), 可以買艾草條, 去信譽好的中葯行找找, 好平, 一盒廿三十元, 1000尺單位都夠你燒幾年, 回家剪半條艾草, 放在玻璃碟 / 陶瓷碗 / 香爐, 等佢慢慢燒, 每房燒佢10-20min, 空間大燒耐少少, 廁所小地方燒時間短d. 首次要燒耐少少, 隔三四日燒第二次, 跟住你會發現有d 蚊仔蚤仔死左响地, 好work,架, 我通常一星期燒一次, 不過艾草好大味, 未必人人接受, 我頭幾次用艾草, 後來頂唔順陣味, 去信譽好的佛俱店或佛舍買藏香(粉狀), 入到佛舍, 店主問你用來做乜, 記得話你想買藏香, 除衊氣, 唔要香精個d 香. (我唔敢話俾店員知, 用來趕霉蚊蚤~~ 0,0)
店的檀香都騙人, 不要信. 不過最work 都係艾草, 燒完成個月間屋都so good 無蚊蚤, 所以我有時旅行出發前, 點定艾草, 回家間屋無晒味又無蚊蚤, 哈哈~
再唔係, 去鬼佬香店買乾的鼠尾草, 方法和艾草一樣, 香味宜人好多.
上年就係咁, 終於唔洗黑牆, 唔洗抺牆, 亦都係幾年來無感冒的一年~~
至於書和衣服呢~ 我都係用呢個方法, 衣服呢, 我無用艾草, 實在太大味, 我會打開衣櫃, 燒藏香囉.
呀~~ 仲有一樣有效趕蟲(包括書蟲)~
去糧油乾貨店, 找大粒狀的"沙薑" (沙薑雞個d 味的沙薑), 記得要大粒狀.
放在碟上, 然後放在蟲出沒的角落, 或一大粒放在書櫃裡, 原來d 蟲仔好憎呢d 沙薑雞既味, 佢地會移民. 不過呢個味實在令我好想食野, 所以我比較少用. |