本帖最後由 hohojohn 於 2021-2-10 13:02 編輯
上回講到 白龍王粟米
已經穿腸過肚 投奔大海回歸自然
某日跟農家檔主閒談間
問:「何不試豆苗」
心諗ok喎 我又鍾意食
即管請教請教 就試吓啦
有都市傳說 話從前豆苗價賤
亦有話 農家攞豆苗餵豬
但回想童年飲宴經驗(現在少去)
總有雞絲豆苗 貴則瑤柱扒豆苗
既出大場面 又何來價賤
況且街市豆苗胚 一百蚊斤都見過
價賤之說 會唔會指老豆苗呢
一開始收到一樽仔青豆
被告之 需間一定距離播種
整整齊齊 好似排隊咁
因為逐粒放 少少哋都攪成個鐘
為免心血益咗啲雀仔 冚返塊網先
其實都算生得快 前後不過數週
比野草生得較慢啦
好慶幸冇乜病害 就可以摘喇
坐住張凳仔 逐塊揀 逐塊摘
真喺心機嘢 所以街市先賣咁貴
我合共摘咗兩次
一次之後 過一陣側芽又生
原則上可以話長種長有
但有還有 好食與否另計
我覺得豆苗喺另舍貪肥
真喺買肥料都買窮你
其實你大可以坐响處齋等
啲豆苗都會照舊生長
不過食落你會好後悔
點解 因為我就喺好後悔果個
第二就喺天氣
人說冬天豆苗特別好食
可能喺煮得好食
不過更有可能喺因為冬天當造
所以如果暖冬會好無奈
之後打算種其他嘢
所以剩低嘅都起返哂出嚟
例行公事 根部檢驗 都算生得健康
惟獨每棵根內黐咗好多白色粒粒嘢
不知原因 不知何物
紀錄在案 日後參考
露地種豆苗告一段落
咁室內種又如何
早排買咗包豆苗
聲稱收割食用一次
底部根莖可重用再種
最多可以收兩造咁話
價格平宜 甚是有趣
佢哋都叫豆苗(包裝上有寫喺青豆)
營養好纖維高 食咗冇壞果啲啦
另外就教你點樣種第二造
都不外乎記得用乾淨水啦
一日換一至兩次水
水大概浸到豆根左右即可
同埋要放光明處
另外官網有更詳細介紹
話收割時剪咩位最有利再種
有落肥冇落肥會有分別
光照氣温都有好大影響...
買嚟比小朋友學科普簡直一流
官網重放埋食譜之類
上完科普上烹飪 僅十元八塊 夫復何求
其實喺一件好成熟嘅產品
出事機會好微
頂多下一造冇生得咁整齊
不過人哋出廠前 响溫室受悉心照顧
去到各家屋企 點都有分別
兩種豆苗 兩種經驗 |