呢個幾星期有2件事令我又喜又悲, 一件係先前講過有隻貓女大肚, 同佢造咗墮胎+絕育, 手術好成功, 宜家正在休養中. 另1件事同樣發生喺呢個時候, 佢係1隻未夠1歲嘅貓仔, 好可愛活潑, 當佢細細個(我估計2個月大左右)就由貓女帶佢嚟我家搵食, 每晚都好似行"孖必"咁見到我開開心心跑嚟喵喵叫咁等食. 佢哋好關照大家, 邊個知道開餐就會返去叫對方嚟食嘢.
就喺我準備捉貓女前1-2晚已發覺唔見貓仔嚟食嘢, 當捉到貓女嗰晚就聽見有貓貓發出嗚嗚聲嘅哀鳴叫聲, 之後幾日都有聽見但睇唔真個樣, 後嚟睇清楚知係貓仔嗚嗚聲仲以為佢俾大貓打傷或係掛住貓女所以嗚嗚喊, 但佢始終唔俾我接近, 等我睇真d佢有咩傷, 直到24号終於可以摸到身體, 發覺身體有俾膠水黏住, d毛乾硬硬咁, 眼睛成眼淚水又有眼膠, 最嚴重係個咀不停有少少血流出, 初時搵唔到傷口位置, 後來估計係佢俾膠黏住手腳想用口解脫, 點知連下顎(或上顎)都扯破至留血不停. 之後用止血散幫佢止住血, 幫佢清潔眼睛, 但身體d膠抹不去, 同時間聯絡獸醫診所約時間. 不過, 佢捱唔到見醫生就喺25号下午1-3點期間安靜咁在痛苦中離去.
睇番呢個多星期佢係點渡過, 以往佢只會晚間嚟搵食, 出事後佢日夜都留喺處搵個地方休息. 一身膠水再加上口部受損令佢食唔到嘢, 多次見佢嗅吓乾糧就行開, 我有試俾細粒bb糧同罐頭糧佢都冇想食意慾. 水~佢又哄埋水兜發吽豆良久, 有時就咁瞓喺水兜旁邊, 我用針筒俾佢都吞唔到. 貓仔就係咁樣痛苦中死去.
雖然唔係養入屋, 但都係我餵養佢大, 見到咁樣我都好心痛, 喊咗好多次. 唔鍾意貓可以用好多方法趕走佢, 如用水噴佢已可嚇走, 點解d人用d咁殘忍方法去對付貓. (估佢用黏老鼠膠)
想請呢個壇住喺元朗某大型平房屋屋院留意, 呢個唔係單1事件, 同鄰居講起, 佢隻自由出入貓都有受傷後返家, 又有1隻街貓本係4肢健全, 後來少咗1隻腳. 好可怕. 希望屋院住戶當發覺有事發生請通知管理處, 只有多人發聲佢哋先會注視.
文字太多, 請見諒.
|