大家去花店買食蟲植物, 選購時自然會買 D 有花莖出咗, 個樣比較企理嘅,
但冇料仕喺呢度叫大家, 買咗盆嘢返去, 要第 1 時間剪咗 D 花莖, 你哋會唔會話我痴線?
1. 食蟲植物由原植場經長途跋涉運送至花店販賣, 加上清關等手續, 少則不見天日 48 小時, 多則難以想像
2. 食蟲植物運送至花店販賣期間, 大部份花店只會用水喉水淋花, 引至食蟲植物慢性衰弱甚至死亡
3. 大家如果成日行食蟲植物花店都會發覺, 盆花下面的確係有個碟, 但 99.99% 係乾塘!長期冇腰水棵嘢會點?
4. D 花店通常都會冷氣長開, 濕度偏低, 照明只會用普通光管, 食蟲植物長期喺咁嘅環境底下又會點?
由於上述種種因素, 冇料仕通常都會喺知道食蟲植物花店有新貨到 48 小時內到達買花, 而買咗 D 食蟲植物返去,
就算棵食蟲植物 D 花有幾靚, 幾多個花蕾都好, 都會大刀一揮, 忍痛割愛, 原因好簡單, 因為棵嘢已經轉緊弱,
如果再加上 D 花係咁狂吸棵嘢 D 養份, 好大機會, 花開唔成, 到棵嘢弱勢已成, 醫返好都要嘥好多時間, 莫講話
要佢再開花!
冇料仕為咗唔想有以上咁多麻煩, 另外一個方法就係同其他本地蟲友直接購買或交換食蟲植物!
以上純屬冇料仕個人意見, 並不是什麽金科玉律! |