本帖最後由 squarehead 於 2014-2-10 00:00 編輯
眨吓眼就過咗一年,又係行年宵花市嘅時候嘞,想同大家分享吓去年一次機緣巧遇下救咗棵樹嘅經過
話說去年歲晚浸左批水仙送畀好友,送完貨走咗去花墟感受吓萬人空巷嘅熱鬧氣氛
迫吓迫吓經過一間連路邊車位都擺滿晒菊花、芍藥同桃花嘅舖頭
見有對夫婦對住棵帶泥嘅桃花評頭品足
鍾意桃花嘅我又點會錯過任何賞花嘅機會吖,一於睇吓冇蝕底
望望棵樹,論樹型,枝條分布均勻,修剪恰到好處,冧多花艷,係合時嘅桃花
經過一輪議價之後,個老闆娘隨即轉身執起把鋸,對準客人指住嗰度
手起鋸落,三兩吓手勢就將棵樹一分為二
上邊嗰截頓時變得相當矜貴,大張紅紙包得靚靚,寓意花開富貴咁話
而下半截就沉香當爛柴,隨手將佢揈落坑渠邊
正所謂本是同根生,只嘆同柄唔同命,以為可以年年花開滿枝
但係當再冇利用價值竟然受到如此對待,唉!
既然有緣遇上,決定帶佢返屋企
幫佢重新打造失去咗嘅嘢,希望佢將來活得多枝多採
上前同檔主打過招呼,一手秤住碌指天光棍踏上歸途
沿路上行花市嘅人莫不投以奇異眼光
光棍
翌日,馬上著手修復行動
去後園挑選接穗,當時桃花正開,而李樹枝條嘅芽眼相當飽滿,比桃枝更合適作為接穗
先將個樹頭連同泥胆完整放入瓦盆,再以堆肥混合植料填滿
用利刀將樹幹上嘅鋸痕修至平滑,切開樹皮,插入削好咗嘅接穗
冇咗parafilm,唯有用保鮮薄膜頂住先,再用嫁接蠟封頂,套上膠袋遮雨保濕,澆透水
嫁接一星期左右,芽體開始萌動 ,到第12天更為明顯
嫁接後16天,嫩葉展開,快將抽生新梢
嫁接後26天,新梢順利抽出,將膠袋解除
嫁接後40天,係時候修吓枝嘞,嫁接至此告一段落
絕處逢生,活著就是希望!
謝謝alextang版主獎賞
謝謝fnv234版主獎賞
謝謝Melb師兄獎賞
謝謝五代師兄獎賞 |