另一個妹聽完我媽佢地响海南島o既奇遇,
佢話… 佢都有D類似咁o既經歷……
妹2: 我都响電視見過呀!
我+妹: 下~!
妹 : 邊處見到?
妹2: 屋企個電視呀!
我+妹: 下~~! 唔係呀!?
我: 又係夜媽媽睇粵語長片見到?
妹: 黐線! 有無咁多呀!?
妹2: 更係唔係啦! 我都唔睇粵語長片o既!
妹: 咁點見到呀? 响個電視反映見到?
妹2: 唔係! 有一次係我夜晚收工返黎無聊, 咁咪開電視睇下有咩睇囉!
果陣時都成點幾鐘, 做緊果套好耐之前o既電視劇喎!
好似重做左無耐, 跟住又返做喎! 唔想睇!
撳去其他台都出晒果D五顏六色一格格,
無野! 睇咁我咪撳左去睇閉路電視果個台囉!
我: 哈~~ 你真係得閒得滯呀!? 閉路電視都好睇o既!?
妹: 唔係喎! 我有時都無聊都會開黎睇下嫁喎!
有陣睇見D人响 lift 做咩野都幾好笑!
妹2: 係呀係呀! 有次見個呀叔了完鼻屎抺左落去扶手後面!
我: 嘩~ 我都話唔好摸果條扶手嫁啦! 哈~! 我都見過呀! 仲大無私樣咁添!
妹: 咁你見到咩呀究竟?
妹2: 果晚成點幾, 我睇緊出面看更响處做咩! (大門個鏡頭影到半個看更位)
點知成晚都無人出入喎! 咁睇左一陣咪去沖涼跟住瞓囉!
沖完涼出黎吹頭, 見有一格影住個男人企左响 lift 角落頭…
我: 邊個角落呀?
妹2: 撳制位後面果個囉! 個閉路電視一路打斜咁影住佢…
佢唔郁喎… 到我吹完頭都唔郁喎!
不過見佢個樣陰陰沉沉又目無表情咁嫁!
我: 比我夜媽媽返黎我都目無表情啦!
妹2: 唔係呀! 我覺得唔對路喎! 跟住我咪熄電視囉!
妹: 企咁耐? 你吹個頭吹咁死耐佢都無郁過…
妹2: 係呀! 定左咁呀… 你知我吹頭成幾個字嫁啦!
我: 我覺得係壞左囉!
妹: 都唔會等到夜媽媽先壞掛? 就算壞左都唔會有野睇啦!
而且o黎部 lift 上到去最高十八樓都唔駛幾個字咁耐…
妹2: 咁咪係囉! 我都覺得有D奇怪!
我等左一陣開返電視再掀返去睇, 佢仲係企左响處呀!
咁仲唔拿臨熄機走去瞓咩!
容乜易一陣佢望上黎點算!?
妹: 哎也! 下次夜媽媽就唔好再睇啦!
妹2: 跟住之後果幾晚我都係搭隔離部 lift 上黎炸…
我: 唔好疑神疑鬼啦!
妹話, 佢果幾日有一日要經三樓平台出口上上面,
佢話經過一家門口, 見門口點住白蠟燭…
唔知係咪就係……
<完> |