火龍果有幾種,有紅皮白肉、紅皮紅肉之外,重有黄皮白肉,不過其實黄皮白肉唔係真係火龍果,而係火龍果既近親,佢地都有好多唔同既名,而且互相對應。
紅皮:火龍果、 紅龍果、紅仙蜜果、芝麻果...
黃皮:金龍果、麒麟果、黄龍果、黃仙蜜果、燕窩果...
我個人習慣叫黄龍果,因為佢黄色,台灣人通常都係咁叫。
聽講因為比較難種,亦比較罕有,香港都好少地方有得賣,而且黄龍果比火龍果好食得多,黃龍果既價錢比火龍果貴好多(即使黃龍果比火龍果細舊、核比火龍果大,相對果肉少都係咁話)。
我響同一間水果攤檔所得既價格如下↓
白肉火龍果:$20/3個(平均每個$6.7)
紅肉火龍果:$25/個
黃龍果:$68/個
即係黃龍果售價係白肉火龍果既10倍有多!唔好忘記,黃龍果細舊過火龍果好多。
至於黃龍果既味道,係非常甜,肉質似燕窩,核又有口感,而且冇火龍果既草腥味。 |