抽中左做侯選陪審員, 今朝去左法院。 

今日有一個法庭需要陪審團。法官大人向10位人士重覆了 一句說話 "It's a Shame"。真係‧‧‧好彩唔係對我講，不過我戥d人醜。

事源個案件會用英語審訊，法官及2位律師都係外國人 (被告係中國人，仲要求有法庭翻譯員添   唔識就咪要求英語審訊啦…)。好多抽中既人出去登記既時候，要求法庭翻譯員同法官大人表示自己d英文好C，可唔可以唔做陪審 blah blah blah…  有位比較有誠意既話: "I could capture 80% of your speech, is it okay?"

法官大人每次都用更嚴厲的口吻發表幾句，然後結語 "It's a Shame"。其中必問既係學歷，全部都話係PXLY畢業。OMG~  真係好醜既巧合呀！！究竟PXLY人係英文差、定係寧願扮英文差都唔想做陪審？

有不少朋友都在PXLY進修，大家通常都撇開了教學質素，揀PXLY係因為佢勁多COURSES，梗有款啱用，而且位置四通八達，放工返學好方便‧‧‧聽聽下，簡直以為揀緊樓。最好既係，你有錢有份見得人既工，PXLY就會願意收。英文唔好？ 唔緊要，揀D中國人講師教既咪得囉。一樣攞到碩士博士。

我唔係想踩PXLY人，我只係好感慨香港既語文教育好失敗。雖然唔識英文唔係罪，我明可以唔講就唔講既心態。其實講英文口窒窒都冇問題，溝通到就得啦~

愈講愈遠… 乜野原因都好，基本上，可以係侯選名單上出現既，都受過大學教育。一個大學畢業生要在大庭廣眾同翻譯員講「我英文水平好差」，然後等人代言: "my English standard is very low"‧‧‧  冇野好講，真係好醜怪，it's a shame!

由於法官大人認為有人係寧願扮英文差都唔想做陪審，已把宣稱自己英文水平好差既人士名單交廣東話審訊法庭採用。明天又要再報到。其實不論語言水平如何，抽中就抽中，唔知醜都係躲不過的。