下午約左同事們加女朋友去睇"花鳥蟲魚",魚,花卉,蟲館都唔太吸引到我,唯一見到有一株蓮坐蕨同埋兩株骨碎補 desplay,有少少失望(對蕨類的展覽),但係紫羅蘭依然美麗,諗起2年前都中過紫羅蘭毒,後尾因為感覺太人工化,開始淡化了種植興趣,不過而家睇人地展覽,都睇到人地用左成年心機先可以有今日,勁!!仲有中國盆景參賽者依然覺得係高高手,勁!!。
後尾去左購物區,有一間鋪頭吸引到我,佢有一株好靚的"斷線蕨",高到去腰咁大株,但要$200....唉,斷線蕨始終唔係太稀有,而且我屋企有個種係度,所以放棄買,好彩都搵到平野買,買左一株水龍骨科的蕨,上埋板都係$30,唔洗諗,自己又無果隻種,問番同行的一個植物高手,應該係"線蕨"的一種,要慢慢搵資料囉^^
晚上同同事加埋女朋友5個北上深圳,第一站去科學館站書城,係入面行左個幾鐘,專程睇植物同埋生物科學果幾行書,終於搵到本好野"云南植物志-第二十卷-蕨類植物" 價值$150人民幣,深圳之後已經覺抵哂,跟住買左隻"羽毛球教學影碟",進修下d羽毛球先^^
最終站去左福田小肥羊打麻辣火鍋,係我史上覺得最好食的火鍋,食羊片,好食過牛~叫左酸辣蕨粉,(以為係蕨菜)點知係凍的米線狀食物,都幾好食,但我想食的是蕨菜(山蘇),上次深圳之行食過,勁好食^^
我地打邊爐又叫汽水又叫啤酒又豪食,一人都係夾番六十幾蚊人民幣,超值!!
之前都唔鐘意上深圳,而家開始發現上面的好處了^^
講番前日嘉道理之行,見到好多蕨,行上山好累,但係好滿足,見到不下於十五種蕨,當中好多都係稀有,仲有佢蕨類植物小莖的樹蕨好多好密好壯觀!!可惜我成下午3點先去到,唔夠喉,下次放假要早d入去溫蕨書啦^^