日誌
毅行十卜
熱度 14 |
連續行左兩年毅行，今年轉下做十卜。
嘩，好彩今年唔玩，最怕凍，幾度氣溫又大風。
今年毅行真係大考驗，加上尾段又改路，難度又增加。
今年自告奮勇十卜供應早餐，但係就到出發前都唔知健兒想食乜野，
時間、地點都未能確定，到起步一刻才接到電話，
只不過是約定行到水浪窩cp3再電聯。
晚上九點剛過，接第一通電話，預估佢地到大埔公路起碼要六七個鐘，
於是早D去訓，其實都係半睡半醒，到半夜兩點幾鐘又接電話，
話上緊大老山，咦，時間都好慢下喎，於是再訓。
凌晨五點，電話再響，話由畢架山落左一半，即刻彈起身出發，
搭乘N車出荃灣24小時麥當當買四份通粉早餐，打的上城門水塘四號燒烤場。
當時尚未天光，又凍又大風，現場都好多人，非常熱鬧。
跟著找個避風位開爐煲水、取暖。
一個鐘後，四個步履躝跚行者到達，匆匆用過早餐又要趕路。
跟著到我自煮早餐自已食，冬陰功麵，好正！
然後施施然行落荃灣會合午餐十卜添飲茶。
飲完早茶又殺上荃錦坳！嘩！今餐不得了，粉、麵、飯、糖水、雞脾，連鮑魚都有！
開五個爐，加加埋埋都有20人，好不熱鬧，直情大食會嘉年華！
飲飽食醉之後，有幾個十卜陪行去到終點，最後以30小時內完成100公里毅行。
鮑魚都有...辛苦都抵啦~
