茄子死咗

其實夏天除咗茄子，許多植物都會因為經常落大雨而生長不良。茄子只係其中一個例子，所以香港夏種田係好難

另一種方法是用嫁接方法，利用抗病能力強的砧木以減低茄子發病機會，例如有啲生產農場會用絲瓜做砧木接嫁接苦瓜，茄子亦可以用砧木例如用托托斯加，托鲁巴姆之類品種做嫁接。

青枯病 就係令到樹莖慢慢中通左 植物不會馬上死掉 一旦染病就好難生得返
初時佢會在中午時表演不夠水少少枯 傍晚又回復青蔥 但好快就會由綠油油的一枯不起
如果玩政府園圃仔有青枯病 裡面所有同科植物都會染病 千奇唔好移去其他無病的田或送植物比人
冬天快到 如果想種番茄 可以在開田落低肥時加入熟石灰 減輕中青枯既機會 青枯病毒喜愛較酸的泥土

sanglo 發表於 2017-9-11 16:35
青枯病 就係令到樹莖慢慢中通左 植物不會馬上死掉 一旦染病就好難生得返
初時佢會在中午時表演不夠水少少枯 ...

其實在中午時分特別是夏天，大部分植物都會因太陽的蒸騰作用而垂頭喪氣。所以很難在初期發現青枯病，以致有機會傳開去及到沒期才發現。另政府格仔田很多時都不知道上一手種什麼，所以很大機會大家種差不多東西，而形成連作。例如上一手冬天種了薯仔、蕃茄而且中了招，到下一手夏季種茄子、椒或再種蕃茄便會染病。

mk2325 發表於 2017-9-12 11:51
其實在中午時分特別是夏天，大部分植物都會因太陽的蒸騰作用而垂頭喪氣。所以很難在初期發現青枯病，以致 ...

嗯 圃田有這個通病 但本人又鐘意種車厘茄 所以自己諗左d辦法減輕中招機會
連續三年冬天都有種 祇是前年在結好果等熟時有早枯病 而番茄最後都收到7成
其餘兩年都 ok

園圃駛用率高，又不知上一手種過咩，不斷連作，所以都冇咩辦法

happy_flower 發表於 2017-9-14 09:32
園圃駛用率高，又不知上一手種過咩，不斷連作，所以都冇咩辦法

都明白。咁下次玩社區園圃避免種茄科農作物。種葉菜類容易D!

我曾經種過社區園圃。面積很細，其實計落都唔平，而且得4個月，種植很大限制，為什麼不正式租田？通常一、二佰呎比較易找，有些設備都不差。

主要係得四個月太短，種到最靚時候就話夠鐘要殺咗佢，變咗真係只能種菜同啲快速生長農作物

mk2325 發表於 2017-9-14 11:03
我曾經種過社區園圃。面積很細，其實計落都唔平，而且得4個月，種植很大限制，為什麼不正式租田？通常一、 ...

其實我屋苑都有格仔田租，面積同社區園圃差不多，雖然租一年，但所有野要自己負責，沒有工具借，沒有導師敎，沒有代澆水。有很多鄰居開頭興致勃勃種菜，但由於無人敎又唔識種，又很多蟲害，他們種種下都棄耕，周圍都生晒雜草。
我參加社區園圃都係想有老師敎，上堂學到野，返工唔得閒都可以有人幫手澆水。我覺得$400都合理，係4個月租期短咗d, 半年就最好！

happy_flower 發表於 2017-9-14 18:21
主要係得四個月太短，種到最靚時候就話夠鐘要殺咗佢，變咗真係只能種菜同啲快速生長農作物 ...

地點都好重要，如果塊田離屋企或公司太遠，例如錦田，好多人嫌遠都唔想去玩。社區園圃好多區都有，交通方便，雖然只得4個月，但每次抽籤都好多人爭崩頭架。

sanglo 發表於 2017-9-14 09:27
嗯 圃田有這個通病 但本人又鐘意種車厘茄 所以自己諗左d辦法減輕中招機會
連續三年冬天都有種 祇是前年 ...

我曾經係屋企天台用大花盆種番茄和茄子，無試過青枯病，可能花盆去水去得快，減底病害的機會和少連作情況。如果要種茄科，下次試下係田邊用花盆種，雖然好似限制了植物的生長範圍，但總好過種種下野到青枯病突然死去。

sblam 發表於 2017-9-14 20:11
我曾經係屋企天台用大花盆種番茄和茄子，無試過青枯病，可能花盆去水去得快，減底病害的機會和少連作情況 ...

我係用呢個方法種，因為夏天實在多雨水塊田去唔切水，浸死我太多農作物，
但不同係個盆剪咗底，根可以自由生到落田，好處係保障一半根唔會浸爛先，肥料又可以減少流失

sblam 發表於 2017-9-14 19:54
其實我屋苑都有格仔田租，面積同社區園圃差不多，雖然租一年，但所有野要自己負責，沒有工具借，沒有導師 ...

其實自己淋水仲好，可以控制水量，如果田主淋就唔會同你每株都淋得咁細心，
我一開始係種天台先，之後有咗經驗就租田種地，大部份田主都好肯教農友，唔駛擔心無人問的，
其餘我都係自己睇書學同上fb啲group問下人，睇下人地點種，種種下就識，
種田最重要係實踐

sblam 發表於 2017-9-14 20:03
地點都好重要，如果塊田離屋企或公司太遠，例如錦田，好多人嫌遠都唔想去玩。社區園圃好多區都有，交通方 ...

都係，每星期郊遊都幾辛苦。住新界區會好啲，住港島區好難每星期入元朗咁遠耕田，租地種大都集中在元朗或大埔區，
除咗租田另一選擇可以唸下天台格仔田，不過唔平而且一格都幾細，種唔到太多野，始終係租地好玩啲同月費平啲。

我租過大埔的桐梓園圃，但後來發現這個園圃是建在政府苗圃裡面，大家祇相隔大概兩公尺。苗圃用自動灑水，而且將農藥加在灑水系統，每天噴幾次。雖然沒有對著社區園圃，但高度有番咁上下，在有風的日子毒霧很容易飄過去污染園友嘅作物

sblam 發表於 2017-9-14 20:03
地點都好重要，如果塊田離屋企或公司太遠，例如錦田，好多人嫌遠都唔想去玩。社區園圃好多區都有，交通方 ...

找一個合適地點絕對是問題。不說交通，環境選擇都有問題。社區園圃很多是建在公園或苗圃裡，食環署是會用農藥噴公園內植物的。自己租田，也不一定好，因為也控制不了左右隔離用農藥。通常田主都將田劃分得很密，所以病、蟲害都很容易傳開。我的田是在林村比較高的位置，左右隔離都是用有機方法種，感覺比較好。但山下近林村河很大遍都是種賀年桃花的。有次經過，正在大噴農藥，路人都要掩鼻。之後經過見到附近泥上面原本的青苔都變成黑色，寸草不生

happy_flower 發表於 2017-9-15 09:17
我係用呢個方法種，因為夏天實在多雨水塊田去唔切水，浸死我太多農作物，
但不同係個盆剪咗底，根可以自 ...

呢個方法又幾好喎，等我黎梗種番茄試下先! 謝謝!

mk2325 發表於 2017-9-15 11:36
找一個合適地點絕對是問題。不說交通，環境選擇都有問題。社區園圃很多是建在公園或苗圃裡，食環署是會用 ...

我覺得種田或種社區園圃睇下好唔好彩，撞正隔離農友種種下唔埋塊田，D病蟲害傳得好快。
我上年係屋苑租格仔田, 種南瓜種得好地地，但隔離塊田D瓜葉染晒白粉病都唔清理，攪到我南瓜野埋白粉病。另外，隔離有一塊田種了南非葉，成一兩層樓咁高又唔理，成棵樹咁，遮晒D陽光之餘根部伸延到我塊田吸水吸肥，好嬲呀!

我隔離田友今年種節瓜，我種苦瓜，佢有隻一两斤節瓜中晒招，掛喺度超過两星期唔理。都唔知生產幾多瓜蠅。根本苦瓜包都包唔切，瓜蠅多到周圍都係，呢頭授粉嗰頭已經中左，真係冇嘢好講