本帖最後由 morning 於 2017-3-28 21:09 編輯
另外補充少少個人經驗,
我係室外有個缸種荷花同睡蓮,初時整時只係缸底放左15CM厚左右既塘泥,亦無放水草入去,怕養蚊掉左十幾條孔雀入去
後來係超市買左叻沙葉(帶根),我就將佢掛係缸邊浸住水種
第一年時因為缸入面植株唔多茂盛,D孔雀大量繁殖起黎(一星期餵3次),
我又冇放過濾器,水就一直都綠綠地,連續天氣好時D水濁到睇唔清魚
到第二年,D叻沙葉生到爆盆,個缸變到好似修剪成球狀既盆栽咁,
缸入面好多根仲有少少絲藻,但出奇地水變到超清澈而且完全無腥味,
魚我亦改成一個月餵1,2次到因為唔想魚一直生,(絕對已經有過百條),D魚平時就食絲藻同爛葉爛根
水變清應該有好多原因,例如水面少左陽光,亦應該因為植物將水既肥份吸收左,水養份少左所以都少綠藻
但問題就黎啦,我冇放任何過濾器打氣設備,水亦係死水無流動既,泥亦係塘泥絕對唔透氣,
而硝化菌係好氧菌,以上條件似乎搵唔到咩原因俾硝化菌大量繁殖到足以維持水清澈無臭
後來某日我查資料時見左某篇研究,係講植物既根可以將氧氣帶入缺氧泥中,
係根既附近好氧菌比較活躍,而遠離根既位置就幾乎只有厭氧菌
咁我個缸就講得通啦,缸入面既荷 睡蓮同叻沙葉既根生到迫晒出黎到缸既一半位置,
而D根就提供左硝化菌既生長環境同魚既食物,自成一個小循環
所以我相信魚菜共生既植床應該係更好更強既硝化菌床
養魚種菜先養菌,你要唔要整多幾層陶粒植床? |