新手試種嘉仔(天使之歌)

就憑兩年種市場蝴蝶蘭經驗，胆粗粗買盆嘉仔泥試吓種。

佢叫天使之歌(Slc. Angel Song 'La La')，好好醜醜都叫有個名字，又係特價再特價，就買佢泥試種啦。 冇乜特別理佢，同蝴蝶蘭放埋一齊，等佢適應環境。第二日啲花就甩晒。


今日發現有牙，比預期快，好的開始是成功的一半。


大咗又肥咗，要好好理佢。


又肥咗，又有新牙(黃箭咀)，好開心。 好似係花梢(藍箭咀)，唔知會唔會大呢？
唔覺意畀佢沐咗雨，又醃咗幾日，結果咁樣(紅箭咀)。


枝花梢長咗DD，牙高咗好多。


枝花梢乾咗，第一個希望落空。 睇睇吓佢好似大肚，大家睇唔睇倒呀？
依排天氣好差，要開燈補光補溫。


難得有幾日天氣好，晒咗幾日，結果晒到紅晒(白箭咀)，不過又唔覺佢有晒燶，睇泥佢都幾襟晒。
個肚又大咗，大家睇唔睇倒啫？


個肚高咗又大咗好多(白箭咀)。


出泥啦，係花牙，好開心呀。


花蕾出哂泥啦。


高咗好多，不過花蕾又晒到一笪笪。


開啦開啦......依.....睇睇吓好熟面口，好似打機見過......嘩.....會食人架！


各位觀眾，大功告成。


總結七個月泥嘅經驗:
** 比蝴蝶蘭生長得快。
** 太多虛位會積水，醃親佢就好麻煩。
** 冬天一定要補光補溫。

靚啊，同買番來果陣一比變化好大，全懶你悉心照顧

請問點樣補光呢?

咁樣補光羅!!! 土炮製作，易裝易拆。


用兩隻20W慳電膽每日照14小時。唔照真係會畀個天蔭乾佢。
天氣好當然要畀佢晒吓吹吓生風。

大大真好心機，花來得也快！當是天道酬勤！

非常靚的花！也是初種，—於要學你加光！

pilcher 發表於 2016-2-6 11:48
非常靚的花！也是初種，—於要學你加光！

憑經驗香港冬春季蔭天特別多, 加光必不可少, 除非你唔介意佢有冇花開啦。

話說上回講到佢開花，都開咗成卄幾日咁耐，之後就抖咗兩個月，終於標新芽啦，雖然等到脛都長，都好開心架！


今次好似有啲唔同，点解會多咗節架？之前第四節就生葉，今次第五節至生咁奇怪？


睇佢粗身大勢好似有喜咁？ 睇住佢個肚一日一日咁大，一日一日咁高，我就一日一日咁開心，今次真係又有喜！


爆冧啦，好開心呀！打孖泥添。依排好熱，希望唔會燒苞啦。


開啦開啦！并頭花，連理蘭，好浪漫呀！依排係大暑佢都照開花冇有怕，真係辛苦佢囉！
啲色有啲唔同，唔知關唔關溫度事，上次鮮黃色，今次米黃色。


經過今次開花第二波有以下總結:
1. 佢鍾意夏天多啲咁。
2. 依隻種睇泥好易開花，唔駛制水，唔駛食東北風，唔駛溫差，唔駛施乜肥勿肥，唔駛耐性..... 咁多唔駛夠啦！
總之對佢好好地佢就自自然然開花俾你睇，好好玩架。

恭喜樓主，睇住佢由芽仔至開花係好開心。好有成功感。天氣熱，日照等因素也會影響花色或形狀。這也是好玩的其中一點。

新手學習種嘉仔的好機會！讚賞！

好靚呀，我又想種呀
請問樓主，種嘉仔，要用咩植料?

壯咗好多,而且又有花,好叻呀~

謝謝大家欣賞，同大家交流經驗和分享心得係好幸福同開心架。

puni3577: 請問樓主，種嘉仔，要用咩植料?

買佢番泥咁耐都未換過植料，係水苔。其他品種既嘉仔未種過唔知。

corina: 壯咗好多,而且又有花,好叻呀~

謝謝欣賞，我會努力架。

話說上回講到佢打孖開花之後，我又開心過後，唔覺唔覺又一個月，唔覺唔覺佢又標芽仔，唔覺唔覺又有期望，原來有期望嘅感覺係好幸福架！！


睇住佢一日一日咁大真係好幸福架，依種幸福嘅感覺係好難形容架。


依！今次佢又有新攪作，兩塊葉禾！好開心啊！


蒲頭喇，奇怪？今次唔覺佢大肚！哈哈哈！！


十一月陽光充沛，晒到個冧鍾無艷咁。
依塊葉最大反應，晒到碳燒咁，不過唔覺佢有燶有軟有黃，段估應該冇事。


開喇開喇，好開心啊！今次佢半夜開，早上見佢已經開左一半，睇唔倒佢含苞待放個相。


又泥總結吓先:
1. 今次叻叻唔駛補光補溫，我睇佢怕熱多過怕冬。
2. 溫度真係會影響顏色，冬天鮮黃色，夏天米黃色。
3. 都係個句，對佢好好地，或者唔多點理佢，佢都會自自然然開花。

開花好密，感受到你既歡愉~

好靚好靚