本帖最後由 雀梅老漢 於 2012-4-30 10:37 編輯
雖然注冊咗快三年了, 但我一向潛水唔出聲, 所以至今仲係屬於"初登記花友, 算係新人. 新來乍到，問聲大家好先!
之前一直都係中意玩盆景, 特別喜歡雀梅, 所以取咗個咁嘅名. 但後來發現我嘅天台太曬, 又唔係日日係屋企, 雀梅盆景時時因失水死亡, 傷心到要跳樓嘅例子數不勝數, 無謂多提了。
最近經多番考慮， 覺得我嘅天台應該適合種蓮， 理由如下：
第一，夠陽光，蓮花要開得好， 聽人講， 最好每日要有5至8個鐘頭的太陽
第二，天台風大，雖然18樓啫， 但掛風球時， 風聲如虎，葡萄鐵架呯呯作響，好似要凌空飛去， 嚇死人！我種嘅葡萄每年都係結子後被吹到成地都係！ 白玉蘭都時時慘遭荼毒, 攔腰折斷都試過， 好得人驚! 但係, 蓮一般唔會生太高, 而且識搖擺卸力， 冇有怕；
第三， 只要我俾足水，就算離開去旅行十幾日， 都唔會有事， 唔困身。
第四，我種咗幾年睡蓮，效果唔錯，開好多花, 都間接證明種蓮是可行的.
下咗決心， 就四週圍搵蓮子，香港好似冇人賣荷花， 上淘寶網查，好似好多， 乜靚品種都有！ 但經過幾次上當受騙， 先慢慢知道原來大多數都係騙人的。其中又以江蘇宿遷的店賣假種子的最多， 大家一定要小心。佢等大多用一般人食嘅蓮子來騙人。大家都知， 蓮大致可以分為藕蓮，子蓮，同埋花蓮。藕蓮，係主要産藕嘅， 一有花蕾， 都掐了它， 以保證藕的營養，所以花都唔會靚；子蓮，主要係為咗收蓮子， 所以品種要求蓮蓬特別大， 結子特別多嘅。只有花蓮， 先至係為了觀賞花而培養出來的。
今年好彩，經綱友介紹， 終於找到一家湖南的店，店中有一位全國著名的種蓮專家叫楊德高，因為培養新種，攞無數獎，全中國人都叫佢種蓮老楊。 向該店買了種藕同蓮子來， 前日先至空運到港 --- 用的是韻逹快遞， 路上竟然走了7天(上海停了4天)，住宅仲要加收30元！ 好彩店家的包裝好細心， 收到種藕還是鮮嫩的， 不然哭都冇淚！
以下我慢慢將種蓮的經過分享俾大家睇！與大家一起學習。 |
提升卡
置頂卡
沉默卡
喧囂卡
變色卡
顯身卡
